25 жніўня ў галерэі "Лабірынт" адбылася прэзентацыя кніг серыі "Бібліятэка Саюза пісьменнікаў Беларусі" выдавецтва "Чатыры чвэрці".
Госці мерапрыемства пазнаёміліся з чатырма новымі кнігамі гэтай серыі: “Побег на край дождя” Алеся Бадака, “Серабрыстыя таполі” Яўгена Хвалея, “На дняпроўскім лузе” Міхася Слівы і “Мне богам дадзена Радзіма” Змітрака Марозава.
Выданне “Побег на край дождя” ўключае выбраныя пераклады прозы і паэзіі, зробленыя беларускімі і расійскімі аўтарамі. Многія творы пісьменніка перакладаліся на сербскую, венгерскую, украінскую, казахскую, туркменскую, азербайджанскую мовы. Некалькі дзясяткаў вершаў Алеся Бадака былі пакладзены на музыку і сталі вельмі папулярнымі песнямі, якія з задавальненнем выконваюць самыя вядомыя беларускія спевакі.
Кніга Яўгена Хвалея “Серабрыстыя таполі” прысвечана 215-годдзю незвычайнага беларускага мастака XIX стагоддзя Валенція Ваньковіча. Многія з іх знаходзяцца ў музеях Літвы, Расіі, Польшчы, Францыі і ЗША. Мастак ведаў Пушкіна, быў лепшым сябрам Адама Міцкевіча.
У кнігу “На дняпроўскім лузе” вядомага празаіка, перакладчыка, крытыка і публіцыста Міхася Слівы ўвайшлі апавяданні, навелы, гумарэскі, мініяцюры, літаратурна-крытычныя артыкулы і рэцэнзіі.
Тонкая інтымная лірыка з кнігі Змітрака Марозава “Мне Богам дадзена Радзіма” прасякнута вобразнасцю, назіральнасцю, глыбокім веданнем побыту вяскоўцаў, вернасцю традыцыям і любоўю да матчынай мовы, насычана прачулымі радкамі пра бацькоўскі край і дарагіх сэрцу людзей.
У межах прэзентацыі падрыхтавана кніжная выстаўка-прагляд, на якой прадстаўлены выданні серыі “Бібліятэка Саюза пісьменнікаў Беларусі” з фонду Нацыянальнай бібліятэкі Беларусі.
Тэлефоны для даведак: (8 017) 293 29 80, 293 27 56.