12 снежня ў Нацыянальнай бібліятэцы Беларусі адбылася прэзентацыя кнігі Таццяны Дзмітрыеўны Арловай «Театральная критика нового времени».
«Театральная критика нового времени» – гэта своеасаблівы дапаможнік для тых, хто хоча навучыцца пісаць пра тэатр. Жывая гісторыя беларускай тэатральнай культуры прадстаўлена партрэтамі акцёраў і рэжысёраў, рэцэнзіямі на спектаклі, эсэ і навуковымі артыкуламі. Кніга з’яўляецца не толькі вучэбным дапаможнікам для студэнтаў, яе з задавальненнем прачытаюць усе, хто цікавіцца кіно і тэатрам.
Таццяна Арлова – доктар філалагічных навук, прафесар Інстытута журналістыкі Беларускага дзяржаўнага ўніверсітэта (БДУ). Нарадзілася ў Маскве ў 1935 годзе. Скончыла аддзяленне журналістыкі філалагічнага факультэта БДУ. Працавала ў газеце “Знамя юности” і Беларускай савецкай энцыклапедыі. Пасля заканчэння аспірантуры Інстытута мастацтвазнаўства, этнаграфіі і фальклору АН БССР з 1972 года працуе на факультэце журналістыкі БДУ. Таццяна Дзмітрыеўна – лаўрэат Літаратурнай прэміі імя Кандрата Крапівы, аўтар 14 кніг, сярод якіх “Театральная журналистика”, “Учитель Д. А. Орлов” і інш.
З прывітальным словам на мерапрыемстве выступілі галоўны рэдактар часопіса “Мастацтва” Людміла Грамыка, заслужаны артыст Рэспублікі Беларусь Леанід Улашчанка, заслужаны артыст, прафесар, дэкан тэатральнага факультэта Акадэміі мастацтваў Уладзімір Мішчанчук, заслужаная артыстка Рэспублікі Беларусь Таццяна Мархель, аўтар кнігі Таццяна Арлова.