23 лютага на базе Нацыянальнай бібліятэкі адбылася прэзентацыя аўтаматызаванай сістэмы “Электронная бібліятэка Нацыянальнай бібліятэкі Беларусі” для супрацоўнікаў аддзелаў абслугоўвання карыстальнікаў бібліятэкі.
У зале прэс-цэнтра прысутныя падрабязна азнаёміліся са зместам рэсурсу, яго магчымасцямі па прадастаўленні аддаленага доступу да лічбавых копій дакументаў з фондаў Нацыянальнай бібліятэкі Беларусі.
На ўсе пытанні супрацоўнікаў адказаў кіраўнік групы распрацоўшчыкаў НВ ТАА “Тодэс” Аляксандр Саўчанка.
Праект рэалізуецца ў некалькі этапаў. На першым этапе ў анлайн-прасторы сталі даступны кніжныя выданні, аўтарэфераты дысертацый і дысертацыі, ноты, плакаты, эстампы, паштоўкі і іншыя выяўленчыя матэрыялы. Усяго – больш за 130 тыс. дакументаў на розных мовах свету.
У адпаведнасці з Законам Рэспублікі Беларусь “Аб аўтарскім праве і сумежных правах” матэрыялы пададзены ў адкрытым і абмежаваным доступе. Дакументы ў адкрытым доступе (больш за 15 тыс.) можна праглядаць у любым зручным месцы і спампоўваць у фармаце pdf. Дакументы з абмежаваным доступам можна праглядаць у чытальных залах бібліятэкі або атрымліваць іх фрагменты з дапамогай службы электроннай дастаўкі дакументаў.
Зарэгістраваныя карыстальнікі маюць права скарыстацца сэрвісам асабістага кабінета, які дазваляе захоўваць пошукавыя запыты, фарміраваць спісы неабходных выданняў з магчымасцю іх сартавання па групах або падборках, заказваць арыгінал дакумента для працы ў чытальных залах бібліятэкі.
Колькасць дакументаў, прадстаўленых у аўтаматызаванай сістэме “Электронная бібліятэка Нацыянальнай бібліятэкі Беларусі”, пастаянна папаўняецца.
Рэсурс даступны па адрасе https://elib.nlb.by.
Матэрыял пададзены цэнтрам алічбоўкі і забеспячэння захаванасці бібліятэчных дакументаў.
