25 чэрвеня ў Нацыянальнай бібліятэцы Беларусі адбыўся квест “Кніжны лабірынт”.
Праз мерапрыемства дзеці азнаёміліся з “лабірынтам” бібліятэкі і творамі мастацтва, якімі яна аздоблена. Заданні квеста раскрывалі цікавосткі і таямніцы гісторыі кніжнай культуры Беларусі.
Квест разгадвалі вучні сярэдняй школы № 172 г. Мінска. Яны ўжо прайшлі поўны курс заняткаў праекта “У госці да кніг” і ў канцы квеста атрымалі не толькі свой прыз, але і ганаровыя дыпломы “Клуба кніжных прафесараў”.
Заняткі арганізаваны ў рамках праекта “У госці да кніг”, накіраванага на развіццё цікавасці да кнігі, папулярызацыю нацыянальнай кніжнай спадчыны, фарміраванне гонару за дасягненні і багатыя традыцыі айчыннай кніжнай культуры.
Квест “Кніжны лабірынт” – гэта творчая гульня-пошук у “лабірынце” Нацыянальнай бібліятэкі Беларусі. Квест зверне ўвагу на тое, што дзеці раней не бачылі і не ведалі. Заданні прывядуць да летапісцаў, старажытных рукапісаў, магнацкай друкарні, мантыі Францыска Скарыны і іншых цікавостак.
Запіс на квест “Кніжны лабірынт” па тэлефоне: (8 017) 293 27 82.
На фота: удзельнікі квеста “Кніжны лабірынт” – вучні сярэдняй школы № 172 г. Мінска.
Матэрыял прадастаўлены навукова-даследчым аддзелам кнігазнаўства.