“Ніхто не забыты, нішто не забыта: да 75-годдзя Перамогі ў Вялікай Айчыннай вайне 1941–1945 гг.” – так называецца дадатак да чарговага выпуску бюлетеня “Новыя кнігі: па старонках беларускага друку” (2020, № 4), прысвечаны тэме ўшанавання памяці аб гэтых векапомных падзеях.
Шмат часу прайшло пасля завяршэння вайны, аднак памяць аб тых, хто ваяваў на франтах, змагаўся з ворагам у партызанскіх атрадах і падполлі, загінуў у турмах і канцэнтрацыйных лагерах, быў зажыва спалены ў вёсках, захоўваецца беларускім народам. Яна адлюстравана ў назвах плошчаў, праспектаў, вуліц нашых гарадоў і населеных пунктаў; увекавечана праз стварэнне алей герояў, экспазіцый музеяў, а таксама літаратурных твораў, мастацкіх і дакументальных фільмаў; захавана ў помніках і абелісках, інфармацыйных стэлах, мемарыяльных комплексах і мемарыяльных дошках, памятных знаках.
Юбілейны дадатак да бюлетэня “Новыя кнігі: па старонках беларускага друку” змяшчае фактычныя і бібліяграфічныя звесткі пра Беларускі дзяржаўны музей гісторыі Вялікай Айчыннай вайны, мемарыяльныя комплексы “Брэсцкая крэпасць-герой”, “Хатынь”, “Буйніцкае поле”, “Яма”, “Курган Славы Савецкай арміі – вызваліцельніцы Беларусі”.
Беларусазнаўчы матэрыял, які тычыцца тэмы Вялікай Айчыннай вайны, можна таксама знайсці ў шэрагу інфармацыйных рэсурсаў Нацыянальнай бібліятэкі Беларусі, у тым ліку – “Беларусь у інфармацыйнай прасторы”, “Беларусь у асобах і падзеях”.
Матэрыял прадастаўлены навукова-даследчым аддзелам бібліяграфіі.
