Дыскусійная пляцоўка “Устойлівае развіццё бібліятэк ва ўмовах культурнай і лічбавай інтэграцыі” прайшла 14 верасня на базе Нацыянальнай бібліятэкі Беларусі ў рамках міжнароднага кангрэса “ВНУ культуры і мастацтваў у міжнародным гуманітарным супрацоўніцтве: глабальныя выклікі і стратэгія дзеянняў”.
Ініцыятарамі і вядучымі арганізатарамі сустрэчы выступілі Беларускі дзяржаўны ўніверсітэт культуры і мастацтваў і Маскоўскі дзяржаўны інстытут культуры па ўзгадненні міністэрстваў культуры Беларусі і Расіі.
Галоўны бібліёграф аддзела даведачна-інфармацыйнага абслугоўвання Вольга Палунчанка выступіла з дакладам аб ролі Нацыянальнай бібліятэкі Беларусі ў задавальненні інфармацыйных патрэб грамадзян Кітайскай Народнай Рэспублікі, якія навучаюцца па спецыяльнасцях у галіне культуры і мастацтва. Былі прадстаўлены найбольш запатрабаваныя платныя паслугі па складанні і рэдагаванні спісаў літаратуры да навуковых прац, культурнае супрацоўніцтва Беларусі і Кітая ў бібліятэчнай сферы, арганізацыя мастацкіх выстаў і камплектаванне фонду літаратурай па кітайскім мастацтве, акцэнтавана ўвага на ролі навучальных заняткаў (на рускай і англійскай мовах) у фарміраванні інфармацыйнай культуры грамадзян Паднябеснай.
Матэрыял пададзены аддзелам даведачна-інфармацыйнага абслугоўвання.
