У красавіку ў музеі кнігі адбыліся чарговыя заняткі “Клуба кніжных прафесараў”. Тэмай заняткаў стала Біблія Францыска Скарыны.
Біблія – адна з ключавых кніг чалавецтва. Эпоха кнігадрукавання ў Еўропе пачалася з выхаду ў свет Бібліі Іагана Гутэнберга на лацінскай мове. У другой палове XV стагоддзя лацінскія пераклады Бібліі друкаваліся ў многіх гарадах Заходняй Еўропы. У той жа час Кнігу кніг пачалі выдаваць і на нацыянальных мовах.
Біблія, падрыхтаваная і выдадзеная Францыскам Скарынам, асаблівая, пра што сведчаць структура выдання, мастацкае афармленне, аўтарскі шрыфт, унікальны пераклад тэксту. На занятках дзеці дазналіся, чаму Францыск Скарына не выдаў Біблію адным фаліянтам, а друкаваў асобнымі кніжкамі невялікага фармату, навошта ён пісаў прадмовы і размясціў у выданні свой партрэт.
Мерапрыемства праводзілася ў даступнай і займальнай форме. Праца ў малых групах дапамагла ўцягнуць у актыўны працэс усіх удзельнікаў. Кожны з дзяцей ствараў дызайнерскі партрэт першадрукара, а пасля ператвараўся ў акцёра і прадстаўляў свайго героя. Творчыя заданні дапамаглі ўдзельнікам заняткаў лёгка засвоіць тэму.