30–31 кастрычніка ў Маскве прайшла II Міжнародная навуковая канферэнцыя “Мова, кніга і традыцыйная культура позняга рускага сярэднявечча ў жыцці свайго часу, у навуцы, музейнай і бібліятэчнай справе ХХI ст.”.
Арганізатарамі мерапрыемства, прысвечанага 50-годдзю навуковай дзейнасці заснавальніка археаграфічнай школы гістарычнага факультэта МДУ, доктара гістарычных навук, прафесара Паздзеевай І.В., выступілі Маскоўскі дзяржаўны універсітэт (МДУ) імя М.В. Ламаносава і фонд “Русский мир”.
На канферэнцыі з дакладам “Калекцыя кірылічных выданняў XVI–XX стст. Нацыянальнай бібліятэкі Беларусі” выступіла загадчык навукова-даследчага аддзела кнігазнаўства Нацыянальнай бібліятэкі Беларусі Кірэева Г.У.
У рабоце канферэнцыі прынялі ўдзел вучоныя і даследчыкі з Беларусі, Расіі, Украіны, Польшчы, ЗША і Румыніі.
Даклады, многія з якіх выклікалі дыскусію, былі прысвечаны ролі палявой і камеральнай археаграфіі пры публікацыі тэкстаў дакументаў, увядзенню ў навуковае абарачэнне кніжных помнікаў, падрыхтоўцы бібліяграфічных паказальнікаў старадрукаваных кніг і рукапісаў.
Археаграфічная лабараторыя МДУ рэгулярна арганізуе ў рэгіёнах Расійскай Федэрацыі навучальныя школы-семінары, у рамках якіх праводзяцца лекцыі і практычныя заняткі (па методыцы апісання старадрукаваных кірылічных кніг, па палеаграфіі, філіграназнаўстве і г.д.). Ад кіраўнікоў археаграфічнай лабараторыі МДУ паступіла прапанова аб правядзенні на базе Нацыянальнай бібліятэкі Беларусі падобнага семінара.
Таксама Кірэева Г.У. наведала Дзяржаўную публічную гістарычную бібліятэку, дзе ў аддзеле рэдкіх кніг знаходзяцца архіўныя матэрыялы па асабістых бібліятэках беларускіх дзеячаў І.Х. Каладзеева і Я.І. Бараноўскага.
У дар атрымана 7 выданняў МДУ імя М.В. Ламаносава.