Здзівіць чалавека ХХІ стагоддзя надзвычай складана. Аднак ёсць цуды, якія не перастаюць здзіўляць. Да іх, безумоўна, адносіцца мініяцюрная кніга. На музейных занятках дзеці стваралі “кнігі-дзюймовачкі” сваімі рукамі.
Мініяцюрныя кнігі зоймуць няшмат месца ў кішэні ці сумачцы. Іх ласкава называюць “малюткі”, “крошкі”, “карлікавыя выданні”, “ліліпуты”, “кнігі-дзеткі”… Прафесіяналамі мініяцюрныя кнігі цэняцца як узор мастацтва кнігадрукавання, а аматараў прывабліваюць сваёй незвычайнасцю. Стварэнне міні-кніг патрабуе самага высокага ўзроўню майстэрства.
Дзе ж можна ўбачыць “кнігі-дзюймовачкі”? Вядома, у музеях! У экспазіцыі музея кнігі дэманструецца мікракніга “Чудо из чудес” (Масква, 1985) памерам 6х9 мм. На 24 старонках на пяці мовах надрукаваны цытаты А. Пушкіна і М. Горкага пра кнігі і партрэты класікаў. Прадстаўлены і беларускія мініяцюрныя выданні прозы і паэзіі А. Міцкевіча, Я. Купалы, Я. Коласа, М. Багдановіча, В. Быкава, Р. Барадуліна і іншых.
Мініяцюрную кнігу можна таксама зрабіць самастойна на музейных занятках ў Нацыянальнай бібліятэцы Беларусі.