27 красавіка ў галерэі “Лабірынт” (3-ці паверх) адбудзецца культурна-асветніцкая акцыя “Майстар беларускага слова – Кандрат Крапіва”: да 120-годдзя з Дня нараджэння класіка беларускай літаратуры, паэта, драматурга, байкапісца і перакладчыка.
Мерапрыемства пройдзе ў рамках святкавання Дня кнігі і аўтарскага права, а таксама Міжнароднага дня інтэлектуальнай уласнасці.
Нацыянальная бібліятэка Беларусі прадставіць гасцям электроннае выданне “Верай і праўдай прайшоў праз эпоху”, падрыхтаванае да юбілею класіка. У мультымедыйным рэсурсе прадстаўлены: бібліяграфія багатай творчай спадчыны Кандрата Крапівы і літаратуры, прысвечанай яго жыццю і творчасці; алічбаваныя першыя прыжыццёвыя выданні твораў і фрагменты тэатральных пастановак па яго п’есах; шматлікія выяўленчыя дакументы і цікавы фактаграфічны матэрыял.
Наведвальнікі акцыі змогуць пачуць жывы голас К. Крапівы з архіва Белтэлерадыёкампаніі, а таксама байкі паэта ў выкананні студэнтаў Беларускай дзяржаўнай акадэміі мастацтваў.
Напрыканцы мерапрыемства адбудзецца падпісанне дагавора паміж Нацыянальнай бібліятэкай Беларусі і Аленай Ігараўнай Атраховіч, захавальнікам творчай спадчыны К. Крапівы, аб прадастаўленні праў на выкарыстанне твораў класіка ў рамках электроннага выдання.
Госці мерапрыемства змогуць азнаёміцца з творамі К. Крапівы і яго навуковымі выданнямі, матэрыяламі пра жыццё і творчасць народнага пісьменніка Беларусі з фондаў Нацыянальнай бібліятэкі Беларусі і Нацыянальнага архіва Рэспублікі Беларусь, арыгіналамі графічных работ мастака і ілюстратара Анатоля Александровіча да твораў пісьменніка.
Пачатак культурна-асветніцкай акцыі а 15-й гадзіне.
Уваход на мерапрыемства – цэнтральны.
Тэлефоны для даведак: (8 017) 266 37 51, 293 79 80.
Е-mail: pr@nlb.by