7 ліпеня ў бібліятэцы адкрыецца выстаўка міжнароднага арт-пленэра “Лета ў правінцыі”.
Выстаўка "Лета ў правінцыі" адлюстроўвае пленэрную дзейнасць выкладчыкаў школ мастацтваў, мастацкіх студый, ВНУ Беларусі, Расіі і Казахстана. Штогод, пачынаючы з 2012 года, мастакі-педагогі збіраюцца для сумеснай работы на гасціннай смалявіцкай зямлі, дзе іх позірку адкрываюцца маляўнічыя пейзажы.
Сімвалічна, што ў Год культуры пленэр адзначае сваё пяцігоддзе – хутка пройдзе V юбілейны арт-пленэр "Чыстыя вытокі". Так што цяперашняя выстаўка – гэта своеасаблівая справаздача яе ўдзельнікаў аб праведзенай за чатыры гады рабоце. Кожны год адрозніваецца ад папярэдняга сваёй тэматыкай і асаблівым найменнем. "Сцежкай памяці" быў названы пленэр, прысвечаны месцам баявой славы на тэрыторыі Смалявіцкага раёна. "Родныя святыні" − гэта храмы і касцёлы, размешчаныя на смалявіцкай зямлі. А сёлета на пленэры пад назвай "Чыстыя вытокі" мастакі будуць ствараць натурныя пейзажы каля рэк і азёр, атрымліваючы асалоду ад жывой прыроды.
Выстаўка “Лета ў правінцыі” змяшчае больш за 50 работ, выкананых у розных тэхніках і матэрыялах. У гэтыя летнія дні запрашаем наведаць экспазіцыю і нацешыцца маляўнічымі палотнамі, якія нясуць прахалоду і свежасць воднай роўнядзі. І тады, магчыма, наступным пунктам вашага летняга маршруту стануць берагі рэк і азёр смалявіцкага краю.
Вернісаж пачнецца а 16-й гадзіне ў галерэі “Ракурс” (2-гі паверх).
Выстаўка будзе доўжыцца да 15 жніўня 2016 года.
Тэлефоны для даведак: (8 017) 293 27 56, 293 28 33.
Е-mail: pr@nlb.by
