28 сакавіка ў галерэі “Лабірынт” адбылася чарговая інтэрактыўная лекцыя-канцэрт з цыкла “Музычная спадчына Беларусі ў прасторы сучаснай культуры”.
Удзельнікі музычнай капэлы Цэнтра даследаванняў беларускай культуры, мовы і літаратуры НАН Беларусі на гэты раз прапанавалі слухачам кантату “Белая голубонька”, напісаную сучасным беларускім кампазітарам Аленай Атрашкевіч. Гэты вакальна-інструментальны твор быў створаны на аснове мастацкага асэнсавання кантавай культуры, якая існавала на тэрыторыі сучаснай Беларусі ў XVII–XVIII стагоддзях. Мастацкі кіраўнік капэлы Галіна Цмыг у даступнай форме прааналізавала гэты музычны твор, распавяла слухачам пра крыніцы, якія натхнілі кампазітара, і пра іх аўтарскую інтэрпрэтацыю.
Канцэрт праходзіў у форме музычнага перформансу ў традыцыях харавога тэатра, які прадугледжвае рэжысуру, сцэнаграфію і нават анімацыйнае суправаджэнне нумароў. Такім чынам быў паказаны актуальны шлях прэзентацыі нацыянальнай харавой спадчыны.
Праект быў рэалізаваны пад кіраўніцтвам хормайстра музычнай капэлы Жанны Філіповіч і рэжысёра-пастаноўшчыка Юльяны Шырко.
Чакаем усіх жадаючых 25 красавіка на наступным канцэрце “Анталогія нацыянальнай харавой спадчыны”, на якім адбудзецца прэзентацыя ўнікальнага выдання – першага тома анталогіі, прысвечанага рэцэпцыі нацыянальнай спадчыны ў сучаснай кампазітарскай і выканальніцкай практыцы.
Тэлефон для даведак: (8 017) 293 27 52.
Матэрыял пададзены аддзелам абслугоўвання спецыялізаванымі фондамі.