25 лютага а 11-й гадзіне ў зале адукацыйных тэхналогій (3-ці паверх) ладзіцца круглы стол “Старажытнасці Навагрудчыны”.
Круглы стол будзе прысвечаны мінуламу Навагрудка як аднаму з найстаражытнейшых гарадоў і важных гістарычных цэнтраў Беларусі, а таксама Навагрудчыне як аднаму са знакавых рэгіёнаў Беларусі, асэнсаванню іх у агульнаеўрапейскім гістарычным і культурным кантэксце.
У пасяджэнні прымуць удзел кнігазнаўцы, гісторыкі, філолагі, культуролагі і краязнаўцы.
Ганаровым госцем мерапрыемства стане Мікалай Віктаравіч Нікалаеў, доктар філалагічных навук, загадчык аддзела рэдкіх кніг Расійскай нацыянальнай бібліятэкі, які з’яўляецца ўнікальным знаўцам гісторыі кніжнай культуры Беларусі і які ў гэтым месяцы адзначае свой юбілей.
М.В. Нікалаеў прадставіць навінку друку «Кніга цудаў Наваградскай іконы Багародзіцы як помнік гісторыі XVII стагоддзя: Даследаванне і тэкст» (Санкт-Пецярбург, 2015).
Запрашаем усіх зацікаўленых прыняць удзел у мерапрыемстве!