25 студзеня ў бібліятэцы адбылася першая інтэрактыўная лекцыя-канцэрт з цыкла “Музычная спадчына Беларусі ў прасторы сучаснай культуры”.
Музычная капэла Цэнтра даследаванняў беларускай культуры, мовы і літаратуры НАН Беларусі прадставіла праграму з твораў беларускіх кампазітараў – выдатных узораў нацыянальнай музыкі розных жанрава-стылявых напрамкаў у выкананні хору, салістаў і струннага квартэта. Канцэрт адкрыла калядная сцэна “А ў свеце нам”, якая адразу стварыла атмасферу зімовага свята.
Увазе слухачоў былі прадстаўлены выдатныя ўзоры беларускай народнай музыкі – “Перапёлачка”, “Кацілася чорна галка”, “Туман ярам” у апрацоўках П. Падкавырава і А. Саўрыцкага.
Па-новаму прагучалі ў выкананні калектыву песні, напісаныя ў сярэдзіне мінулага стагоддзя беларускімі кампазітарамі Н. Сакалоўскім, Ю. Семянякам, А. Туранковым, П. Падкавыравым, І. Лучанком. Сучасную трактоўку гэтых твораў слухачы ўспрынялі з вялікай увагай і сустракалі бурнымі апладысментамі.
Калектыў выступаў у дызайнерскіх касцюмах Людмілы Дамненковай. Канцэрт суправаджаўся маляўнічым слайд-шоу. Салісты-вакалісты, хор і струнны квартэт выступалі пад кіраўніцтвам хормайстра Жанны Філіповіч і капельмайстра Святаслава Рачэўскага. Праграму вяла мастацкі кіраўнік музычнай капэлы Галіна Цмыг.
Чакаем усіх жадаючых на наступным канцэрце “Каб любіць Беларусь”, прысвечаны тэме Радзімы ў творчасці беларускіх кампазітараў на вершы нацыянальных паэтаў. Сустрэча адбудзецца 22 лютага ў 18:30.
Тэлефон для даведак: (8 017) 293 27 52.
Матэрыял пададзены аддзелам абслугоўвання спецыялізаванымі фондамі.
