29 чэрвеня ў рамках культурна-адукацыйнага форуму “Беларусь і Расія: адзіная сістэма каштоўнасцей” адбылося ўзнагароджанне ордэнам “Крылаты леў”.
З прывітальным словам на ўрачыстасці, якая прайшла ў Мінскім дзяржаўным вышэйшым радыётэхнічным каледжы, выступіў рэктар навучальнай установы Сяргей Анкуда. Уручыў узнагароды прарэктар Інстытута кіравання (г. Архангельск) Міхаіл Собалеў.
За выдатныя заслугі ў справе адраджэння Айчыны міжнародным ордэнам “Крылаты леў” узнагароджаны дырэктар Нацыянальнай бібліятэкі Беларусі Раман Матульскі і галоўны рэдактар газеты “Рэспубліка” Анатоль Лемяшонак.
Ордэнам “Крылаты леў”, заснаваным у 1991 годзе, узнагароджваюцца людзі, якія ўнеслі вялікі ўклад у развіццё навукі, культуры і спорту. Валоданне знакам адрознення такога ўзроўню – высокі прэстыж і прызнанне таго факта, што намаганні і праца ацэнены па заслугах.
Сярод адзначаных гэтай узнагародай – прадстаўнікі розных сфер дзейнасці: музыкант сэр Пол Макартні, экс-прэзідэнт СССР Міхаіл Гарбачоў, пісьменнік Габрыэль Гарсіа Маркес, акадэмік Мікалай Петракоў, спартсмен і мысляр Шры Чынмой. У Беларусі ордэна ўдастоены народны артыст СССР Уладзімір Мулявін, рэктар Віцебскага дзяржаўнага медыцынскага ўніверсітэта Валерый Дзяйкала, рэктар Гродзенскага дзяржаўнага аграрнага ўніверсітэта Вітольд Песціс, рэктар Магілёўскага дзяржаўнага ўніверсітэта імя А. Куляшова Канстанцін Бандарэнка, знакаміты беларускі барэц трохразовы алімпійскі чэмпіён Аляксандр Мядзведзь і інш.
