9 кастрычніка калекцыя найлепшых выданняў пра Беларусь была ўрачыста перададзена ў дар Нацыянальнай бібліятэцы Польшчы.
Акцыя адбылася ў межах рэалізацыі праекта “Беларусь сёння”, які быў ініцыіраваны ў 2010 г. міністэрствамі культуры, інфармацыі і замежных спраў нашай краіны. Сёлета ў межах прафесійнага візіту дэлегацыі Нацыянальнай бібліятэкі Беларусі ў найбуйнейшую бібліятэку Польшчы было перададзена больш як 80 найлепшых беларускіх кніг – лаўрэатаў нацыянальных і міжнародных кніжных конкурсаў.
Ва ўрачыстай цырымоніі перадачы кніг прынялі ўдзел намеснік дырэктара Нацыянальнай бібліятэкі Беларусі Аляксандр Суша і намеснік дырэктара Нацыянальнай бібліятэкі Польшчы Катажына Сьляска, супрацоўнікі абедзвюх нацыянальных бібліятэк, Беларускага культурнага цэнтра ў Варшаве і Міністэрства культуры і культурнай спадчыны Польшчы.
Наяўнасць у Нацыянальнай бібліятэцы Польшчы – галоўным інфармацыйным цэнтры суседняй краіны – будзе садзейнічаць распаўсюджванню ведаў пра Беларусь у польскім грамадстве, што паспрыяе паляпшэнню ўзаемаразумення паміж народамі Беларусі і Польшчы.
Прадстаўнікі Нацыянальнай бібліятэкі Польшчы і Міністэрства культуры і культурнай спадчыны Польшчы адзначылі важнасць і своечасовасць ініцыятывы беларускага боку, падкрэсліўшы зацікаўленасць у далейшым развіцці супрацоўніцтва паміж нацыянальнымі бібліятэкамі Беларусі і Польшчы. Прадстаўнікі абедзвюх бібліятэк дамовіліся пра канкрэтныя формы ўзаемадзеяння на бліжэйшыя два гады.