18 мая а 16-й гадзіне ў галерэі “Лабірынт” у рамках Дзён культуры Швецыі ў Беларусі (13 мая – 12 чэрвеня) будзе ладзіцца літаратурна-творчая сустрэча “Гукі і ўспаміны дзяцінства”.
Падчас сустрэчы пройдзе прэзентацыя кнігі шведскіх дзіцячых пісьменнікаў Юі і Томаса Вісландэраў “Малы і мядзведзік”. Гэта сумесны праект РВУ “Літаратура і мастацтва”, Пасольства Швецыі ў Рэспубліцы Беларусь і Нацыянальнай бібліятэкі Беларусі.
Кніга Юі і Томаса Вісландэраў “Малы і мядзведзік” – адна з любімых кніг у Швецыі. Аўтары са шчырай увагай і павагай да асобы галоўнага героя расказваюць пра свет яго забаў, выдумак, думак і гульняў. Кніга адрасавана дзецям, але і для дарослых яна будзе цікавай і карыснай.
Кніга шведскіх аўтараў была выдадзена на беларускай мове ў РВУ “Літаратура і мастацтва” ў 2010 г. Пераклад са шведскай падрыхтаваны Надзеяй Кандрусевіч. Выданне ажыццяўлялася пры падтрымцы Пасольства Швецыі ў Рэспубліцы Беларусь.
У прэзентацыі возьмуць удзел Надзвычайны і Паўнамоцны Пасол Швецыі ў Рэспубліцы Беларусь Стэфан Эрыксан, прадстаўнікі выдавецтва “Літаратура і мастацтва”, Нацыянальнай бібліятэкі Беларусі і аўтар кнігі Юя Вісландэр, якая правядзе аўтограф-сесію.
Вядучая вечара – пісьменніца, галоўны рэдактар часопіса “Бярозка” Алена Масла. У ходзе мерапрыемства гасцей чакае выступленне ўзорнага дзіцячага тэатра Палаца моладзі “Сіняя птушка” і музычны падарунак ад Яраша Малішэўскага.
