Годным завяршэннем цыкла навукова-практычных мерапрыемстваў Баранавіцкага дзяржаўнага ўніверсітэта, прымеркаваных да Дня беларускай навукі, сталі выязныя заняткі Школы маладога даследчыка, якія адбыліся 27 студзеня ў Нацыянальнай бібліятэцы Беларусі.
Падчас заняткаў доктар педагагічных навук, прафесар Ларыса Глазырына акцэнтавала ўвагу слухачоў на найбольш важных тэарэтычных аспектах педагагічнай навукова-даследчай дзейнасці, а кандыдат педагагічных навук, дацэнт Наталля Дубешка падзялілася вопытам і вынікамі вывучэння якасці адукацыі – даследавання, сугучнага абвешчанаму ў 2024 годзе ў Беларусі Году якасці.
Спецыялісты бібліятэкі ажыццявілі інфармацыйную падтрымку адукацыйнага мерапрыемства. Сярод прапанаваных дакументаў ганаровае месца занялі навуковыя працы спікераў. Прэзентацыя бібліятэчных інфармацыйных рэсурсаў і паслуг і буклеты-памяткі ў падарунак былі ўдзячна ўспрыняты студэнтамі і выкладчыкамі.
Абраны фармат мерапрыемства – гутарка настаўнікаў і вучняў за круглым сталом у зале каворкінгу ў атрыуме – дазволіў у атмасферы ўзаемнай павагі падзяліцца ведамі, прагледзець выданні, абмяняцца думкамі.
Нацыянальная бібліятэка Беларусі запрашае ўстановы адукацыі і іншыя арганізацыі да правядзення адукацыйных мерапрыемстваў з прэзентацыяй інфармацыйных рэсурсаў і паслуг, падборам літаратуры па тэме.
Па пытаннях арганізацыі мерапрыемстваў звяртацца па тэлефонах: (8 017) 293 29 04, 293 27 03, е-mail: obo@nlb.by, obo-head@nlb.by.
Матэрыял пададзены аддзелам бібліятэчнага абслугоўвання.
