Нацыянальная бібліятэка Беларусі (НББ) прыняла ўдзел у IV Міжнароднай навукова-практычнай канферэнцыі “Мяндзінскія чытанні”, якая адбыліся 8–13 ліпеня ў горадзе Сыктыўкар (Рэспубліка Комі, Расійская Федэрацыя).
Сёлета канферэнцыя была прысвечана 200-годдзю з дня нараджэння Івана Сцяпанавіча Мяндзіна (1823–1894), вядомага прадстаўніка Усць-Цылемскага стараверскага кніжнага цэнтра Рускай Поўначы, адметнага збіральніка, перапісчыка і пераплётчыка рукапісаў, аўтара арыгінальных твораў.
У канферэнцыі прыняла ўдзел з пленарным дакладам “Фарміраванне калекцыі стараверскіх рукапісаў Нацыянальнай бібліятэкі Беларусі” галоўны бібліёграф навукова-даследчага аддзела кнігазнаўства Галіна Кірэева.
Праграма канферэнцыі была насычанай, разнастайнай, праходзіла ў некалькіх месцах: Інстытуце гуманітарных навук Сыктыўкарскага дзяржаўнага ўніверсітэта імя Піцірыма Сарокіна (9–10 ліпеня) і сяле Усць-Цыльма (11–12 ліпеня).
Удзельнікаў чакала багатая культурная праграма, падчас якой яны пазнаёміліся з рукапісамі, створанымі Іванам Мяндзіным, і кніжнай культурай Рускай Поўначы ў цэлым. Для ўдзельнікаў чытанняў была адкрыта выстава “Кніжная спадчына пячорскіх старавераў ў фондах Навуковай бібліятэкі СДУ імя Піцірыма Сарокіна”.
У Усць-Цыльме даследчыкі пабывалі з экскурсіяй у гісторыка-мемарыяльным музеі заснавальніка навуковага асваення поўначы А.У. Жураўскага. А таксама прынялі ўдзел у святах “Пятроўшчына” (абрадавае свята з адгалоскам рытуальна-памінальнага абраду на беразе ракі Пячоры напярэдадні Дня апосталаў Пятра і Паўла) і “Усць-Цылемская горка” (штогадовае фальклорнае свята паморскіх старавераў з дэманстрацыяй старадаўніх святочных строяў, якое захоўваецца на працягу пяці стагоддзяў, у якім удзельнічаюць усцьцылемы ўсіх пакаленняў).
У рамках мерапрыемства супрацоўнікі Нацыянальнай бібліятэкі Рэспублікі Комі пазнаёмілі ўдзельнікаў з калекцыяй рэдкіх кніг, арганізацыяй бібліятэчнай дзейнасці і абслугоўвання карыстальнікаў. Бібліятэка вядзе кнігаабмен з НББ, таму ў фондах нядрэнна прадстаўлена літаратура пра Беларусь, класіка беларускай літаратуры.
Мерапрыемства аб’яднала даследчыкаў кніжнай культуры, гісторыкаў, бібліятэкараў, краязнаўцаў, выкладчыкаў універсітэтаў.
Матэрыял пададзены навукова-даследчым аддзелам кнігазнаўства.