Супрацоўнікі Нацыянальнай бібліятэкі Беларусі ўзялі ўдзел у рабоце II Міжнароднай навукова-практычнай канферэнцыі "Берасцейскія кнігазборы: праблемы і перспектывы даследавання".
У ходзе канферэнцыі, якая прайшла ў Брэсце з 31 мая па 3 чэрвеня 2012 г., разглядалася роля Брэстчыны ў кніжнай спадчыне Беларусі, падводзіліся вынікі работы па атрыбуцыі археалагічных знаходак на месцы старога горада на тэрыторыі Брэсцкай крэпасці. У канферэнцыі ўзялі ўдзел бібліятэкары, архівісты, гісторыкі, краязнаўцы з Беларусі, Казахстана, Літвы, Расіі, Польшчы, Украіны.
Дырэктар Нацыянальнай бібліятэкі Беларусі Р.С. Матульскі выступіў з прывітаннем і пленарным дакладам на пленарным пасяджэнні канферэнцыі, а таксама прыняў удзел у прэзентацыі сваёй кнігі "Из прошлого в будущее. Библиотеки Беларуси" (Мінск, 2011, Т. 1) і калектыўнай манаграфіі "Гісторыя беларускай кнігі" (Мінск, 2011, Т. 2). З ліку супрацоўнікаў Нацыянальнай бібліятэкі Беларусі актыўны ўдзел у рабоце канферэнцыі прынялі намеснік дырэктара па навуковай рабоце А.А. Суша, загадчыца НДА кнігазнаўства Г.У. Кірэева, галоўны рэдактар рэдакцыі перыядычных выданняў і выданняў з працягам Л.Г. Кірухіна.
Акрамя пленарнага і трох секцыйных пасяджэнняў, у рамках канферэнцыі адбылося выязное пасяджэнне на тэму "Кніжныя зборы роду Сапег" у г. п. Ружаны і наведванне Дома-музея Т. Касцюшкі ў Мерачоўшчыне.