17 красавіка ў Нацыянальнай бібліятэцы Беларусі адбылося ўрачыстае адкрыццё Х Міжнародных кнігазнаўчых чытанняў “Кніжная культура Беларусі XVI – сярэдзіны XVIІ ст.: да 440-годдзя выдавецкай дзейнасці Мамонічаў”.
Арганізатарамі мерапрыемства з’яўляюцца Міністэрства культуры Рэспублікі Беларусь і Нацыянальная бібліятэка Беларусі.
У канферэнцыі прымаюць удзел дакладчыкі з Беларусі, Літвы, Польшчы, Расіі, Украіны і Чэхіі. Вядомыя навукоўцы прадстаўляюць вынікі найноўшых даследаванняў па гісторыі беларускай кніжнай культуры XVI–XІХ стст. і выдавецкай дзейнасці.
Дасягненні кнігадрукавання XVI–XVIІ стст., здзейсненыя ў складаным сінтэзе і ўзаемадзеянні розных культур, мелі значны ўплыў на далейшае развіццё нацыянальнай культуры Беларусі. Важнае месца ў беларускім кнігадрукаванні належала сям’і Мамонічаў, якія ў Вільні ў сваім доме заснавалі друкарню. Яна праіснавала каля 50 гадоў і стала адной з важнейшых з’яў айчыннай культуры таго часу. Друкарня Мамонічаў дабілася афіцыйнага прызнання, тройчы атрымлівала каралеўскія прывілеі на права выпуску царкоўна-рэлігійных, свецкіх і юрыдычных выданняў. Таксама ў друкарні выйшлі першыя беларускія кірылічныя кнігі прававога характару – Статут Вялікага Княства Літоўскага 1588 г. і Трыбунал 1586 г. У выдавецкай дзейнасці Мамонічы ўлічвалі патрэбы розных слаёў насельніцтва, выкарыстоўвалі новаўвядзенні ў друкарскай справе, выпускалі кнігі на розных мовах. Выданні друкарні Мамонічаў з’яўляюцца важнымі крыніцамі даследавання культуры Беларусі.
У рамках Х Міжнародных кнігазнаўчых чытанняў у музеі кнігі размясцілася выстаўка "Надрукавана ў доме Мамонічаў", адкрыццё якой адбылося 17 красавіка ў галерэі "Лабірынт". Экспазіцыя падрыхтавана Нацыянальнай бібліятэкай Беларусі сумесна з Цэнтральнай навуковай бібліятэкай імя Я. Коласа Нацыянальнай акадэміі навук Беларусі. На ёй прадстаўлены найбольш поўны збор старадрукаў друкарні Мамонічаў канца ХVІ – пачатку ХVІІ ст. з абедзвюх бібліятэк.
"Прыемна ўсведамляць, што знаходзяцца прычыны дастаць з глыбокіх сховішчаў старажытныя кнігі, рукапісы і выставіць іх на ўсеагульнае агляданне", – адзначыў пад час адкрыцця выстаўкі дырэктар Цэнтральнай навуковай бібліятэкі імя Я. Коласа Нацыянальнай акадэміі навук Беларусі Аляксандр Груша.
У сваю чаргу дырэктар Нацыянальнай бібліятэкі Беларусі Раман Матульскі звярнуў увагу гасцей на тое, што нягледзячы на ўзрастаючую зацікаўленасць карыстальнікаў электроннымі выданнямі, вытокі іх належаць кнігам друкаваным, і дзякуючы выстаўцы "Надрукавана ў доме Мамонічаў" у кожнага з нас ёсць магчымасць дакрануцца да крыніцы кнігавыдання на беларускай зямлі.
"Мы павінны нястомна прапагандаваць кнігу, асабліва сярод моладзі!" – падкрэсліў пад час мерапрыемства беларускі дзяржаўны дзеяч, пісьменнік Анатоль Бутэвіч.
Урачыстасць прайшла ў музычным суправаджэнні ўзорнага ансамбля старажытнай музыкі "Brevis".
Сярод экспанатаў выстаўкі – першае выданне тыпаграфіі, сапраўдны шэдэўр кнігадрукавання ХVІ ст. – напрастольнае Евангелле (1575), надрукаванае Пятром Мсціслаўцам. У экспазіцыі прадстаўлена таксама другое выданне выдатнага майстра – Псалтыр (1576), больш вядомы як «Псалтыр з чырвонымі кропкамі». З выданняў пачатку 1590-х гг. дэманструюцца Псалтыры з паследаваннем, упрыгожаныя выявамі фантастычных крылатых істот, а таксама Апостал, Евангелле без сігнатур і Евангелле з сігнатурамі. Акрамя таго, у музеі прадстаўлены надрукаваныя ў пачатку ХVІІ ст. пераклад на польскую мову Статута Вялікага Княства Літоўскага 1588 г. (1619) і выданні Трыбунала (1616 і 1623).
Выстаўка ў музеі кнігі будзе працаваць па 23 чэрвеня 2014 г.
Тэлефоны для даведак: (8 017) 293 27 56, 293 27 82.
Е-mail: pr@nlb.by
 |
 |
 |
 |
 |
 |
 |
 |
 |
 |
 |
 |
 |
 |
 |
