29 лістапада а 17-й гадзіне ў галерэі “Ракурс” адбудзецца ўрачыстае адкрыццё IV Мінскага міжнароднага фестывалю лічбавага мастацтва “Terra Nova”.
Фестываль “Terra Nova” праводзіцца з мэтай стымулявання прымянення новых тэхналогій у выяўленчым мастацтве, развіцця камп’ютарнай графікі і мультымедыямастацтва ва ўмовах Беларусі, актывізацыі творчых кантактаў паміж мастакамі розных краін, прыцягнення ў мастацкі працэс новага пакалення аўтараў. “Terra Nova” з’яўляецца зручным эксперыментальным полем, дзе выяўляюцца новыя экзістэнцыяльныя сэнсы творчасці.
Ужо ў чацвёрты раз на выставачных плошчах Нацыянальнай бібліятэкі Беларусі будуць дэманстравацца творы, выкананыя ў лічбавым фармаце. Праграма фестывалю ўключае выстаўку лічбавай фатаграфіі і камп’ютарнай графікі, а таксама відэапрагляды на працягу месяца ў галерэі “Лабірынт” і зале адукацыйных тэхналогій Нацыянальнай бібліятэкі Беларусі.
У рамках дзейнасці фестывалю будзе праведзены конкурс, вынікі якога падвядзе аўтарытэтнае журы. Творы будуць разгледжаны ў намінацыях “Лічбавае фота”, “Камп’ютарная графіка”, “Відэа-арт”, “Відэакліп музычны”, “Анімацыя”, “Рэкламны ролік”, “Кароткі метр”. У структуры фестывалю прадугледжаны тры праграмы – конкурсная, прагляд, гасцявая.
Сярод удзельнікаў – прадстаўнікі з Эстоніі, Расіі, Украіны, Беларусі. На выстаўцы экспануецца больш за 100 твораў.
Выстаўка будзе працаваць да 23 студзеня 2013 года.
Тэлефоны для даведак: (8 017) 293 27 67, 293 28 33.
Е-mail: pr@nlb.by