3 верасня ў межах святкавання Дня беларускага пісьменства ў Нацыянальнай бібліятэцы адбылася прэс-канферэнцыя і прэзентацыя, прысвечаная выхаду новага навучальнага выдання для 1 класа ўстаноў агульнай сярэдняй адукацыі з беларускай мовай навучання.
Спецыяльна выдадзены да 2021/2022 навучальнага года буквар адрозніваецца ярка выяўленым нацыянальным кантэнтам. У яго ўключаны заданні і практыкаванні, якія адлюстроўваюць каштоўнасці культуры беларускага народа. Акрамя гэтага, першакласнікі атрымалі доступ і да медыякантэнту – з дапамогай qr-кодаў.
Над распрацоўкай і выданнем буквара працавала шмат людзей. Аўтарскі калектыў быў адабраны па выніках конкурсу Нацыянальнага інстытута адукацыі (НІА). Яго супрацоўнікі і рэцэнзенты арганізавалі і правялі экспертызу дапаможніка, а работнікі выдавецкага цэнтра НІА падрыхтавалі дапаможнік да выдання. Упершыню, працуючы з вучэбным дапаможнікам “Буквар”, дзецям можна глядзець мультыплікацыйныя фільмы пра літары алфавіта, выпушчаныя кінастудыяй “Беларусьфільм”.
З прывітальным словам выступіла дырэктар Нацыянальнага інстытута адукацыі Валянціна Гінчук: “На старонках вучэбнага выдання акумулявана метадычная думка не аднаго пакалення вучоных. Буквар быў створаны намаганнямі вялікай колькасці людзей. У ім рэалізаваны сучасныя метадычныя падыходы да навучання чытанню, аўтарскія знаходкі і ўвасоблены практычны педагагічны вопыт”.
Намеснік генеральнага дырэктара Нацыянальнай бібліятэкі Беларусі Аляксандр Суша адзначыў, што выпуск вучэбнага дапаможніка – унікальная падзея, з якой пачынаецца новая, вельмі цікавая і надзвычай разнастайная, эпоха ў гісторыі беларускага буквара: “Беларусы зрабілі вельмі шмат, каб буквар стаў сусветнай з’явай, бо самыя тыражныя і папулярныя выданні ствараліся беларусамі ў розныя стагоддзі. Зараз буквар – адзін з брэндаў Беларусі, сімвал велічы і годнасці нашых продкаў, нас і нашай культуры. Сённяшняя з’ява – нагода для гонару!”.
Генеральны дырэктар кінастудыі “Беларусьфільм” Уладзімір Карачэўскі і стваральнікі мультыплікацыйных фільмаў для першакласнікаў Ірына Тарасава і Канстанцін Андрушачкін распавялі пра іх карпатлівую шасцігадовую гісторыю стварэння і прэзентавалі адну з серый мультфільма пра літары алфавіта.
Дэкан факультэта пачатковай адукацыі Беларускага дзяржаўнага педагагічнага ўніверсітэта імя М. Танка, кандыдат філалагічных навук, дацэнт Наталля Ждановіч: “Зараз мы назіраем нараджэнне новага буквара. Ён дасць першакласнікам навык, які дазволіць вучыцца, знаходзіць новыя веды і дасягаць новыя вяршыні. Спрыяе гэтаму метадычна граматны складзены буквар дзвюх настаўніц і навукоўцаў з вялікім стажам, якія перадаюць сувязь пакаленняў і каласальны вопыт”.
Намеснік дырэктара Гімназіі № 23 г. Мінска Галіна Полудзень распавяла аб распрацаваным кантэнце для Адзінага інфармацыйна-адукацыйнага рэсурса Беларусі. Гэта справа была ажыццёўлена намаганнямі настаўнікаў сталічнай гімназіі № 23 і аўтараў буквара ў адпаведнасці са зместам новага вучэбнага дапаможніка.
На прэзентацыі таксама выступілі і аўтары навучальнага дапаможніка – дацэнт кафедры беларускага і рускага мовазнаўства факультэта пачатковай адукацыі Беларускага дзяржаўнага педагагічнага ўніверсітэта імя М. Танка, кандыдат педагагічных навук, дацэнт Вольга Свірыдзенка і вядучы навуковы супрацоўнік Нацыянальнага інстытута адукацыі, кандыдат педагагічных навук, дацэнт Вольга Цірынава.
У межах мерапрыемства госці таксама змаглі азнаёміцца са спецыяльна падрыхтаванай выставай-праглядам 30 нацыянальных буквароў і выданняў для пачатковага навучання чытанню і грамаце з фондаў Нацыянальнай бібліятэкі.
Арганізатары – Нацыянальная бібліятэка Беларусі і Нацыянальны інстытут адукацыі.
Матэрыял падрыхтаваны аддзелам сувязей з грамадскасцю.
