12 красавіка ў Цэнтральнай раённай бібліятэцы імя Ф. Скарыны горада Полацка адбыўся семінар “Ад Полацка пачаўся свет”.
Арганізатарам мерапрыемства выступіла Полацкая раённая цэнтралізаваная бібліятэчная сістэма. Семінар быў прысвечаны тром датам, значным як для горада, так і для ўсёй краіны: 500-годдзю беларускага кнігадрукавання, 1155-годдзю Полацка і 100-годдзю газеты “Полацкі веснік”.
З прывітальным словам да ўдзельнікаў семінара звярнулася Ганна Іванаўна Бурнасенка, дырэктар ДУК "Полацкая раённая цэнтралізаваная бібліятэчная сістэма”.
500-годдзю беларускага кнігадрукавання былі прысвечаны даклады Людмілы Барысаўны Дзядзюлінай, загадчыцы інфармацыйна-бібліяграфічнага аддзела полацкай бібліятэкі (“Краязнаўчая работа Цэнтральнай бібліятэкі імя Ф. Скарыны ў рамках святкавання 500-годдзя беларускага кнігадрукавання”), і Вольгі Аляксееўны Дарафеевай, галоўнага бібліятэкара аддзела бібліятэказнаўства Віцебскай абласной бібліятэкі імя У.І. Леніна (“Актывізацыя дзейнасці бібліятэк Віцебскай вобласці па далучэнні насельніцтва да скарбаў беларускага кнігадрукавання”).
Таццяна Андрэеўна Сапега, загадчыца сектара навукова-праектнай работы навукова-даследчага аддзела кнігазнаўства Нацыянальнай бібліятэкі Беларусі, выступіла з дакладам "Метады прыцягнення дзяцей да актыўнага пазнання кніжнай культуры” і правяла майстар-клас “Францыск Скарына – беларускі першадрукар”.
Краязнаўчай рабоце бібліятэк былі прысвечаны даклады Кацярыны Дзмітрыеўны Яскевіч, вядучага бібліёграфа аддзела краязнаўства і бібліяграфіі Віцебскай абласной бібліятэкі (“Краязнаўчыя бібліяграфічныя рэсурсы Віцебскай абласной бібліятэкі імя У.І. Леніна”), Галіны Васільеўны Маслоўскай, загадчыцы бібліятэкі-філіяла № 2 імя А. Герцэна Полацкай РЦБС (“10 гадоў краязнаўчаму клубу «Я – палачанін» ”), Ірыны Пятроўны Водневай, загадчыцы Краязнаўчага музея-філіяла Нацыянальнага полацкага гісторыка-культурнага музея-запаведніка (“« Полацкі веснік» для ўсіх і кожнага”), Славіны Вячаславаўны Гаўрылавай, вядучага навуковага супрацоўніка Краязнаўчага музея-філіяла (“Ганаровыя грамадзяне г. Полацка”), Кацярыны Сяргееўны Ячмянёвай, метадыста аддзела бібліятэчнага маркетынгу Полацкай РЦБС (“Краязнаўчыя базы даных Полацкай раённай цэнтралізаванай бібліятэчнай сістэмы”).
У рамках семінара была арганізавана прымеркаваная да Года навукі і акцыі “Полацк – маладзёжная сталіца Рэспублікі Беларусь 2017” сустрэча з маладымі вучонымі – выкладчыкамі Полацкага дзяржаўнага ўніверсітэта, кандыдатамі эканамічных навук Вольгай Сяргееўнай Гулягінай і Кацярынай Юр’еўнай Афанасьевай – і маладой сям’ёй Святланы і Аляксандра Неліных. Палачане падзяліліся сваімі думкамі пра кнігу, яе ролю ў іх навуковым і асабістым жыцці. Выступленні, поўныя адкрыццяў і асабістых перажыванняў, настроілі аўдыторыю на трапяткое і паважлівае стаўленне да кнігі і прафесіі бібліятэкара.
Таксама ў рамках семінара адбыліся прэзентацыі і выстаўкі.