11 сакавіка 2008 г. а 16-й гадзіне ў галерэі “Лабірынт” Нацыянальнай бібліятэкі Беларусі адбудзецца творчая гасцёўня “Абаянне раманса”, арганізаваная ў рамках праекта “Кропка адліку” (аўтар праекта Ганна Лель).
Раманс, які ўзнік у сярэднія вякі ў Заходняй Еўропе як свецкая песня, пастаянна развіваўся, удасканальваўся і ў выніку трансфармаваўся ў надзвычайны сплаў высокай паэзіі і цудоўнай музыкі. Сёння, як і сто гадоў назад, рамансу ўласцівы нейкая асаблівая давернасць інтанацыі, шчырасць, цеплыня, адкрытасць, нават непрыкрытасць пачуццяў. Раманс перадае ўнутраны свет чалавека ва ўсіх псіхалагічных нюансах, чым і прыцягвае ўвагу многіх выканаўцаў і слухачоў.
У творчай гасцёўні пад акампанемент раяля і гітары прагучаць рамансы розных эпох і краін у выкананні выкладчыка інструментальнай музыкі Кірылы Успенскага, аўтара-выканаўца песень і рамансаў Аляксея Нежаўца, салісткі Беларускай дзяржаўнай філармоніі Алены Казанцавай.
Сярод удзельнікаў гасцёўні таксама выступяць супрацоўніцы бібліятэкі Юлія Фралова і Наталля Святлова.
Кантактныя тэлефоны: (8017) 293 27 10, (8029) 772 57 52, (8029) 345 09 52
