Вынікі ІІ Рэспубліканскага конкурсу “Бібліятэка – цэнтр духоўнай асветы і выхавання” былі падведзены 5 ліпеня ў Нацыянальнай бібліятэцы Беларусі.
У склад журы ўвайшлі епіскап Барысаўскі і Мар’інагорскі Веньямін (старшыня журы), дырэктар Нацыянальнай бібліятэкі Беларусі Р.С. Матульскі (намеснік старшыні журы), галоўны бібліятэкар навукова-даследчага аддзела бібліятэказнаўства Нацыянальнай бібліятэкі Беларусі В.А. Рынкевіч (сакратар журы), начальнік аддзела па справах рэлігій апарата Упаўнаважанага па справах рэлігій і нацыянальнасцей А.У. Араеў, галоўны спецыяліст упраўлення агульнай і сярэдняй адукацыі Міністэрства адукацыі Рэспублікі Беларусь І.У. Булаўкіна, галоўны спецыяліст упраўлення ўстаноў культуры і народнай творчасці Міністэрства культуры Рэспублікі Беларусь С.У. Бацян, сакратар Выдавецкага савета Беларускай праваслаўнай царквы Т.А. Самайлюк, загадчыца Цэнтральнай бібліятэкі Беларускага экзархата С.Ф. Вінаградава і член Савета па бібліятэчнай дзейнасці пры Сінадальным аддзеле рэлігійнай адукацыі і катэхізацыі Беларускага экзархата Т.А. Квасава.
Сёлета паводле новай рэдакцыі Інструкцыі аб парадку правядзення конкурсу адбор работ праводзіўся ў некалькі этапаў. Лепшыя работы з усіх рэгіёнаў Беларусі пасля папярэдняга адбору на абласным узроўні прынялі ўдзел у прамежкавых (ведамасных) этапах конкурсу, якія прайшлі ў Нацыянальнай бібліятэцы Беларусі і Навукова-педагагічнай бібліятэцы Галоўнага інфармацыйна-аналітычнага цэнтра Міністэрства адукацыі Рэспублікі Беларусь. Работы, якія занялі першае і другое месца, былі прадстаўлены на суд кампетэнтнага журы рэспубліканскага этапу конкурсу.
У выніку карпатлівай работы журы вызначыла пераможцаў у наступных намінацыях:
- “Духоўна-маральнае выхаванне дзяцей і моладзі”;
- “Гісторыя Праваслаўя роднага краю”;
- “Сям’я – спадчынніца маральных і духоўных каштоўнасцей”;
- “Патрыятычнае выхаванне на праваслаўных традыцыях”.
Пасля зацвярджэння пратакола пасяджэння журы Мітрапалітам Мінскім і Заслаўскім Паўлам, Патрыяршым Экзархам усяе Беларусі інфармацыя аб пераможцах будзе выстаўлена на афіцыйных сайтах Беларускага экзархата Маскоўскага патрыярхату, Нацыянальнай бібліятэкі Беларусі, Сінадальнага аддзела рэлігійнай адукацыі і катэхізацыі і сайце "Праваслаўныя бібліятэкі Беларуси".
Па традыцыі цырымонія ўзнагароджання пераможцаў ІІ Рэспубліканскага конкурсу “Бібліятэка – цэнтр духоўна асветы і выхавання” пройдзе ў Нацыянальнай бібліятэцы падчас работы IV Міжнароднага кангрэса “Бібліятэка як феномен культуры”, які адбудзецца 4–6 кастрычніка 2016 года.