12 сакавіка ў бібліятэцы прайшла прэзентацыя анімацыйнага праекта “Аповесць мінулых гадоў”.
У кожнага горада свой твар, свой лёс, свая непаўторная гісторыя. Якія яны – беларускія гарады, як выглядаюць, чым жылі раней і якімі сталі з цягам часу? Аб гэтым і не толькі распавядае маленькім гледачам і іх бацькам серыя мультфільмаў пра гісторыю ўзнікнення гербаў гарадоў Беларусі.
У кароткіх сюжэтах тлумачыцца значэнне адлюстраваных на гербах сімвалаў, адны з якіх маюць больш старажытнае паходжанне, другія – больш сучаснае. Усяго 36 гарадоў − па шэсць гербаў з розных абласцей Беларусі: Мінск, Гродна, Брэст, Магілёў, Гомель, Віцебск, Полацк, Навагрудак, Шклоў, Мазыр, Карэлічы, Заслаўе, Горкі, Тураў, Быхаў, Слуцк, Ліда, Пінск, Бабруйск, Рагачоў і многія іншыя.
Прафесіяналы ўжо высока ацанілі праект “Аповесць мінулых гадоў” беларускіх кінематаграфістаў – мультыплікацыйны цыкл стаў лаўрэатам чатырнаццатага Фестывалю анімацыйнага кіно, што праходзіць у Расіі ў Суздалі (Расія), узяўшы перамогу ў намінацыі “Лепшае выяўленчае рашэнне”. Спадзяёмся, захапляльныя і пазнавальныя сюжэты знойдуць жывы водгук і ў юных аматараў гісторыі.
У прэзентацыі ўзялі ўдзел дырэктар Нацыянальнай бібліятэкі Беларусі Раман Матульскі, генеральны дырэктар Нацыянальнай кінастудыі “Беларусьфільм” Уладзімір Карачэўскі, рэжысёр, кіраўнік праекта “Аповесць мінулых гадоў” Ігар Волчак, аўтары анімацыйных сюжэтаў і прадстаўнікі СМІ.