15 мая 2009 года ў галерэі “Панарама” на агляднай пляцоўцы адбылося адкрыццё арт-праекта “Жыццё з ВІЧ – Жыццё”.
Арт-праект быў ініцыіраваны БГА “Пазітыўны рух” у рамках праекта “Прафілактыка і лячэнне ВІЧ/СНІДу ў Рэспубліцы Беларусь” і рэалізуецца ў адпаведнасці з Праграмай развіцця ААН у супрацоўніцтве з Міністэрствам аховы здароўя Рэспублікі Беларусь пры фінансавай падтрымцы Глабальнага фонду для барацьбы са СНІДам, туберкулёзам і малярыяй.
Выстаўка, якая ўключае 50 фотаработ, складаецца з твораў маладых мастакоў – Вікторыі Казак, Веры і Максіма Ярмоленка. Адна з дзяўчын мае станоўчы ВІЧ-статус.
Мэта выстаўкі – садзейнічаць разбурэнню грамадскіх стэрэатыпаў адносна людзей, якія жывуць з ВІЧ, адапціраваць і пазіцыяніраваць ВІЧ-пазітыўных людзей у свядомасці соцыума як раўнапраўных, раўнацэнных яго членаў са сваім унікальным бачаннем жыцця.
Экспазіцыя распавядае пра шлях, перашкоды, перажыванні, пачуцці і думкі чалавека, які атрымаў дыягназ “ВІЧ-інфекцыя”, пра людзей, якія знаходзяцца побач з ім, і грамадства ў цэлым. Арт-праект дапамагае ўсвядоміць кожнаму чалавеку каштоўнасць жыцця праз суперажыванне галоўнай гісторыі.
Сваёй фотавыстаўкай мастакі нагадваюць пра тое, што невылечна захварэць можа кожны з нас, у сітуацыі дыскрымінацыі можа апынуцца любы, гэта можа адбыцца з нашымі блізкімі людзьмі.
Наведаць выстаўку можна да 31 мая з боку ўвахода на аглядную пляцоўку ў адпаведнасці з рэжымам яе работы.
Тэлефоны для даведак: 293-28-23, 293-27-67.
Е-mail: pr@nlb.by
 |
 |
 |
 |
 |
 |
