21 кастрычніка ў Нацыянальнай бібліятэцы Беларусі ў рамках Дзён Амана ў Мінску (21–23 кастрычніка) адбылося адкрыццё мастацкай выстаўкі “Аман кліча”.
Свае творы на выстаўцы прадставіў вядомы іракскі мастак Хусейн аль-Джааман. У яго карцінах – сюжэты з паўсядзённага жыцця Амана. Акрамя жывапісу, у экспазіцыю ўвайшлі фотаработы аманскіх фатографаў, якія адлюстроўваюць шматвяковую культуру, прыроду, народныя рамёствы, сучасную архітэктуру краіны.
У рамках мерапрыемства Пасольства Амана ў Маскве перадало ў дар Нацыянальнай бібліятэцы Беларусі кнігі па гісторыі, культуры і традыцыях Амана і макет аманскага карабля XVIII ст.
У адкрыцці выстаўкі “Аман кліча” ўзялі ўдзел намеснік міністра культуры Рэспублікі Беларусь Тадэвуш Стружэцкі, генеральны сакратар Цэнтра ісламскай культуры імя Султана Кабуса Хабіб бэн Мухамед аль-Рыямі, пасол Амана ў Расіі і Беларусі па сумяшчальніцтве Мухамад аль-Хасан, дырэктар Нацыянальнай бібліятэкі Беларусі Раман Матульскі, прадстаўнікі дыпламатычнага корпуса, міністэрстваў і ведамстваў краіны.
Аманскія і арабскія музычныя творы прадставіў аманскі музычны ансамбль пры Султанскай канцылярыі “Арабскі Тахт”. Прыемным сюрпрызам для гасцей вечара стала дэманстрацыя нацыянальных касцюмаў вядомых аманскіх дызайнераў Анісы аль-Заджалія і Афафа аль-Фарсі.
Адкрыццё выстаўкі стала важным крокам на шляху збліжэння і ўмацавання традыцыйных сяброўскіх адносін беларускага і аманскага народаў, развіцця культурнага супрацоўніцтва дзвюх краін.
Экспазіцыя размясцілася ў галерэі “Панарама” (22-гі паверх, закрытая аглядная пляцоўка) і будзе доўжыцца да 19 лістапада. Плата за ўваход складае кошт наведвання агляднай пляцоўкі Нацыянальнай бібліятэкі Беларусі.
 |
 |
 |
 |
 |
 |
