З 3 красавіка па 6 мая ў Нацыянальнай бібліятэцы Беларусі (2 паверх, пакой 207) адкрыта тэматычная кніжная выстаўка " Здаровы лад жыцця: міжнародны вопыт і стратэгія Беларусі", прысвечаная Сусветнаму дню здароўя і 60-годдзю членства Беларусі ў САЗ.
Сусветны дзень здароўя штогод адзначаецца 7 красавіка - у дзень стварэння Сусветнай арганізацыі аховы здароўя (САЗ), статут якой быў прыняты 7 красавіка 1948 г.
САЗ з’яўляецца міжурадавай структурай ААН, закліканай каардынаваць міжнароднае супрацоўніцтва ў галіне аховы здароўя і глабальныя дзеянні па барацьбе з хваробамі.
Рэспубліка Беларусь з’яўляецца адной з краін-заснавальніц САЗ і актыўна ўдзельнічае ў працы гэтай арганізацыі. Мэта супрацоўніцтва нашай дзяржавы з САЗ заключаецца ў тым, каб, выкарыстоўваючы сусветны вопыт, забяспечыць найбольш спрыяльныя ўмовы для ўдасканалення працы сістэмы аховы здароўя Беларусі. Супрацоўніцтва з САЗ дазваляе не толькі выкарыстаць вопыт гэтай арганізацыі, але і атрымаць фінансавыя сродкі, а таксама прыцягнуць увагу сусветнай супольнасці да найбольш вострых праблем краіны: рэфармаванню аховы здароўя і пераадоленню наступстваў катастрофы на ЧАЭС.
Прапанаваныя ўвазе чытачоў і наведвальнікаў бібліятэкі матэрыялы выстаўкі адлюстроўваюць праграмы і прыярытэтныя напрамкі, па якіх ажыццяўляецца ўзаемадзеянне Рэспублікі Беларусь і Сусветнай арганізацыі аховы здароўя. Прапанаваная тэматычная выстаўка вельмі актуальная, паколькі гэты год абвешчаны ў нашай краіне Годам здароўя.
Экспазіцыя ўключае наступныя тэматычныя раздзелы:
- міжнародныя рэкамендацыі і стандарты ў галіне аховы здароўя
- нарматыўна-прававыя дакументы, якія адлюстроўваюць супрацоўніцтва Рэспублікі Беларусь з САЗ
- рэформа аховы здароўя
- здароўе маці і дзіцяці
- наступствы аварыі на ЧАЭС
- барацьба з інфекцыйнымі хваробамі
- палітыка ў галіне здаровага ладу жыцця і лекаў
На выстаўцы ёсць больш за 100 дакументаў: кнігі, брашуры, перыядычныя выданні, мімеаграфаваныя матэрыялы. Вялікую частку выстаўкі складаюць дакументы міжнародных арганізацый (ААН, САЗ, ЮНЕСКА, Еўрапейскага Саюза, Савета Еўропы) на рускай, французскай і англійскай мовах.
Выстаўка будзе карысна для спецыялістаў у галіне аховы здароўя, медыцынскіх работнікаў, навуковых супрацоўнікаў, выкладчыкаў, студэнтаў вышэйшых навучальных устаноў, а таксама для ўсіх, хто цікавіцца праблемамі аховы здароўя.
