З 20 студзеня па 15 лютага ў зале беларускай літаратуры (пам. 205) праходзіць кніжная выстаўка “Заглянуўшы ў душу стагоддзяў”, прысвечаная 70-годдзю Л.М. Дайнекі.
Леанід Мартынавіч Дайнека – беларускі пісьменнік, перакладчык, лаўрэат Літаратурнай прэміі імя І. Мележа Саюза пісьменнікаў Беларусі (1987), Дзяржаўнай прэміі Беларусі імя К. Каліноўскага (1990).
Любоў да роднага краю, цікавасць да яго гісторыі, занепакоенасць лёсам Бацькаўшчыны праходзяць праз усю творчасць пісьменніка. Свой шлях у літаратуру Леанід Дайнека пачынаў як паэт. Яго першая кніга вершаў “Галасы” выйшла ў 1969 г. Плённай стала работа Л. Дайнекі ў прозе. Гістарычныя раманы “Меч князя Вячкі” (1987), “След ваўкалака” (1988), “Жалезныя жалуды” (1990) добра ведаюць як у Беларусі, так і за яе межамі. Творы здзіўляюць сваёй рэалістычнасцю, захапляльнасцю сюжэтаў, арыгінальнасцю мовы, яны трывала ўвайшлі ў школьныя праграмы.
На выстаўцы экспануюцца кнігі паэзіі, раманы аўтара, творы, якія не друкаваліся асобна, а былі выдадзены ў часопісах. Гэта “Герадоцінкі”, раман “Назаві сына Канстанцінам” і асобныя вершы. У экспазіцыі прадстаўлены работы Леаніда Дайнекі як перакладчыка з рускай, украінскай, літоўскай, татарскай моў.
Асобны раздзел прысвечаны перакладам твораў пісьменніка.
Раздзел экспазіцыі “Наватар у жыцці і ў літаратуры” знаёміць з публікацыямі, змешчанымі ў энцыклапедычных выданнях і кнігах літаратурных крытыкаў В. Шынкарэнкі, С. Андраюка, Д. Бугаёва, П. Дзюбайлы, якія раскрываюць жыццё і творчасць пісьменніка, ілюструюць творчы падыход Л. Дайнекі да літаратуры.
Экспазіцыя налічвае каля 100 дакументаў.
Кантактны тэлефон: (8 017) 293 27 16.