З 1 ліпеня па 31 жніўня ў зале перыядычных выданняў (пам. 106) праходзіць тэматычная выстаўка “За крок ад бездані: аб праблеме наркаманіі”.
Традыцыя навуковага вывучэння наркаманіі налічвае не адзін дзясятак гадоў. Імклівае пашырэнне гэтай з'явы выклікала напружаныя дыскусіі пра яе прыроду, прычыны і ўмовы распаўсюджвання. Злоўжыванне наркотыкамі сёння дасягнула памераў, якія трывожаць усю сусветную грамадскасць. У многіх краінах наркаманія прызнана сацыяльным бедствам. Спецыялісты лічаць, што ва ўзнікненні залежнасці істотную ролю іграюць біялагічныя, псіхалагічныя, культурныя і сацыяльныя фактары.
Праблема немедыцынскага спажывання наркатычных і псіхатропных рэчываў застаецца актуальнай і для Беларусі. У апошні час назіраецца рост захворванняў наркаманіяй, рэзка абвастрылася праблема распаўсюджвання сінтэтычных наркотыкаў (курыльных сумесяў або "спайсаў"), якія аказваюць больш разбуральнае ўздзеянне на арганізм. Гэтыя пытанні закранаюцца ў артыкулах такіх перыядычных выданняў, як "Здравоохранение", "Медицинские новости", "Здаровы лад жыцця", "Беларуская думка", "Юстыцыя Беларусі", "Судовы веснік", "Медицинские знания", "Народная газета", "Настаўніцкая газета", "Знамя юности", "Выхаванне і дадатковая адукацыя", "Народная асвета", "Воспитание школьников", "Рюкзак", "Переходный возраст" і інш.
Матэрыялы, прадстаўленыя на выстаўцы, акцэнтуюць увагу таксама на тым, што асабліва пагібельным з'яўляецца ўжыванне наркатычных рэчываў у маладзёжным асяроддзі, у выніку чаго паражаецца і сучаснасць, і будучыня грамадства. Аўтары публікацый аналізуюць фактары, якія ўплываюць на падлеткавую наркаманію; разглядаюць унутрысямейныя, асобасныя, сацыяльныя і іншыя прычыны залежнасці; лічаць, што папярэдзіць цікавасць да наркотыкаў у дзіцяці можна, сфарміраваўшы ў яго сапраўдныя каштоўнасці, тады жаданне ўцячы ад праблем з дапамогай наркотыку саступіць месца патрэбнасці вырашыць гэтую праблему.
Усяго на выстаўцы прадстаўлена каля 40 перыядычных выданняў.
Кантактны тэлефон (8 017) 293 25 87.