З 2 кастрычніка па 1 лістапада ў зале беларускай літаратуры (пам. 205) праходзіць выстаўка “Вытокі чалавечай свядомасці”, прымеркаваная да 100-годдзя з дня нараджэння беларускага пісьменніка, драматурга, перакладчыка У.І. Краўчанкі.
Пераважным у творчасці Усевалада Ігнатавіча Краўчанкі (1915–1961) стаў жанр апавядання. Пісьменнік выдаў каля двух дзясяткаў зборнікаў. Тэматыка яго твораў вельмі разнастайная. Гэта творы пра жыццё калгаснай вёскі, моладзь, якая шукае сваіх дарог у жыцці, пра Айчынную вайну, дружбу народаў і барацьбу за мір, пра родны край. Стылю яго прозы ўласцівы рэалістычная дакладнасць і адначасова мяккі гумар. У. Краўчанка займае асобнае месца і ў беларускай дзіцячай літаратуры. Працаваў таксама і ў галіне драматургіі.
Адкрывае экспазіцыю раздзел, у якім прадстаўлена літаратурная спадчына пісьменніка. Сярод экспанатаў – зборнікі твораў “На крутым павароце” (1937), “Зямля гудзе” (1945), “Жыта красуе” (1951), “Вясна на Палессі” (1952), “Над хвалямі Прыпяці” (1964), “Крыгалом” (1985) і інш. Наведвальнікі выстаўкі маюць магчымасць пазнаёміцца таксама са зборнікам аднаактовых п’ес “Апошняя варажба” (1960). У гэтым жа раздзеле змешчаны кнігі твораў і асобныя выданні, якія напісаны для дзяцей: “Таямніца адной вышкі” (1935), “Злачынства ля зялёнай тоні” (1961), “Таямніца вугла альфа” (1973) і інш. Пісьменнік добра ведаў унутраны свет дзяцей, адчуваў іх запатрабаванні.
Працягвае экспазіцыю раздзел, у якім У. Краўчанка прадстаўлены як перакладчык. У ліку перакладаў – “Бялее парус адзінокі” В. Катаева (1949), “Сцяганосцы” А. Ганчара (1949, разам з І. Мележам), “Служу Радзіме” І. Кажадуба (1950) і інш.
Шмат твораў пісьменніка перакладзена на іншыя мовы. Аб гэтым сведчыць вялікая колькасць зборнікаў, а таксама асобных выданняў, прадстаўленых на выстаўцы ў трэцім раздзеле.
У апошнім раздзеле чытач знойдзе больш падрабязную інфармацыю пра жыццё і творчасць пісьменніка з дапамогай размешчаных тут біяграфічных і літаратурна-крытычных публікацый.
Усяго на выстаўцы экспануецца каля 100 выданняў.
Кантактны тэлефон: (8 017) 293 27 16.
 |
 |
 |
 |
 |
 |
