З 16 мая па 12 чэрвеня ў зале дакументаў міжнародных арганізацый (пам. 207g) адкрыта тэматычная выстаўка "Выбіраем жыццё без тытуню!", прысвечаная Сусветнаму дню без тытуню.
Гэты Дзень быў абвешчаны ў 1988 годзе Сусветнай арганізацыяй аховы здароўя (СААЗ) на 42-й сесіі Сусветнай асамблеі аховы здароўя (рэзалюцыя № WHA42.19) і штогод адзначаецца 31 мая.
СААЗ заснавала Сусветны дзень без тытуню для таго, каб звярнуць увагу сусветнай супольнасці на тытунёвую эпідэмію і яе смяротныя наступствы. Кожны год СААЗ і партнёры адзначаюць гэты Дзень, прыцягваючы ўвагу да рызыкі для здароўя, звязанай з тытунекурэннем, і заклікаючы да правядзення эфектыўнай палітыкі для памяншэння маштабаў ужывання тытуню.
Перад сусветнай супольнасцю была пастаўлена задача – дамагчыся таго, каб у XXI стагоддзі праблема тытунекурэння знікла. XXI стагоддзе наступіла, аднак праблема па-ранейшаму існуе. Барацьба з нікатынам працягваецца. Глабальнай мэтай Сусветнага дня без тытуню з’яўляецца садзейнічанне ахове гэтага і будучых пакаленняў не толькі ад разбуральных наступстваў для здароўя, але таксама ад сацыяльных, экалагічных і эканамічных бедстваў, звязаных з ужываннем тытуню і ўздзеяннем тытунёвага дыму.
Спажыванне тытуню з’яўляецца другой па значнасці прычынай смерці ва ўсім свеце. На дадзены момант ад яго памірае кожны дзясяты дарослы чалавек. Штогод ад "тытунёвай эпідэміі" на Зямлі гіне каля 6 мільёнаў чалавек (больш за 600 тысяч з якіх, не з’яўляючыся курцамі, паміраюць з-за ўздзеяння другаснага тытунёвага дыму). Пры адсутнасці дзеянняў да 2030 года гэтая лічба вырасце да 8 мільёнаў чалавек. У сусветным маштабе гэта больш чым сухоты, мацярынская смяротнасць, дарожна-транспартныя здарэнні, самагубствы і забойствы разам узятыя.
Барацьба з тытунекурэннем з’яўляецца складанай і шматпланавай праблемай, якая ўключае сацыяльныя, псіхалагічныя, эканамічныя, юрыдычныя і іншыя аспекты. Яе стратэгічная задача – перамена стаўлення насельніцтва да курэння, усведамленне грознай небяспекі гэтай страшнай звычкі для здароўя і жыцця чалавека, папярэджанне пачатку курэння сярод новых пакаленняў. У адказ на глабалізацыю "тытунёвай эпідэміі" была распрацавана Рамачная канвенцыя САЗ па барацьбе з тытунем (РКБТ СААЗ), якая прынята Сусветнай асамблеяй аховы здароўя 21 мая 2003 года і ўступіла ў сілу 27 лютага 2005 года. У шасці стратэгіях канвенцыі прапанаваны асноўныя крокі, якія варта зрабіць дзяржавам у барацьбе з тытунекурэннем. Гэта забарона прамой і ўскоснай рэкламы тытуню; павышэнне падаткаў і цэн на тытунь; стварэнне ва ўсіх грамадскіх і рабочых памяшканнях свабоднага ад тытунёвага дыму асяроддзя; размяшчэнне буйных і выразных графічных папярэджанняў аб небяспецы для здароўя на ўпакоўках тытунёвых вырабаў; арганізацыя дапамогі тым, хто хоча адмовіцца ад шкоднай звычкі.
Рэспубліка Беларусь падпісала Канвенцыю 17 чэрвеня 2004 года, а ратыфікавала 8 верасня 2005 года. Тым самым наша дзяржава ўзяла на сябе абавязак прымаць усё яе ўмовы на нацыянальным, рэгіянальным і міжнародным узроўнях, каб пастаянна і істотна скарачаць спажыванне тытуню. У краіне забаронена рэклама тытунёвых вырабаў, зменены ў адпаведнасці з РКБТ СААЗ патрабаванні да іх упакоўкі, праводзіцца работа па стварэнні тэрыторый, свабодных ад курэння, забаронена курэнне ў грамадскіх месцах.
З нагоды Сусветнага дня без тытуню 2016 года Сусветная арганізацыя аховы здароўя і сакратарыят Рамачнай канвенцыі СААЗ па барацьбе супраць тытуню заклікаюць усе краіны падрыхтавацца да простай (стандартызаванай) упакоўкі тытунёвых вырабаў. Простая упакоўка з’яўляецца важнай мерай для зніжэння попыту, паколькі яна робіць тытунёвыя вырабы менш прывабнымі, абмяжоўвае выкарыстанне тытунёвай упакоўкі з мэтай рэкламы і стымулявання продажу тытуню.
На выстаўцы прадстаўлена звыш 60 дакументаў: кнігі, брашуры, перыядычныя выданні, буклеты. Экспазіцыя ўключае наступныя тэматычныя раздзелы:
- здаровы лад жыцця: прафілактыка тытунёвай залежнасці;
- псіхалагічныя аспекты тытунёвай залежнасці;
- курэнне і яго ўплыў на здароўе;
- жыццё без тытуню: як пазбавіцца шкоднай звычкі.
Выстаўка будзе карыснай спецыялістам у галіне аховы здароўя, медыцынскім работнікам, педагогам і сацыяльным работнікам, студэнтам вышэйшых навучальных устаноў, а таксама ўсім, хто цікавіцца праблемай тытунёвай залежнасці і пытаннямі здаровага ладу жыцця.
Карысныя спасылкі
- Сусветны дзень без тытуню 2016
- Ініцыятыва па вызваленні ад тытунёвай залежнасці
- Асноўныя прынцыпы ажыццяўлення Артыкула 11
- Асноўныя прынцыпы ажыццяўлення Артыкула 13
- Асноўныя звесткі аб ужыванні тытуню
- Публікацыі аб тытуні
- Сусветны дзень без тытуню: падрыхтавацца да простай упакоўкі
- Удзельнікі сустрэчы высокага ўзроўню выказваюць падтрымку прынцыпу простай упакоўкі
- Глабальны эфект даміно ў працэсе ўвядзення стандартызаванай упакоўкі
- Рамачная канвенцыя СААЗ па барацьбе супраць тытуню