З 1 лютага па 31 сакавіка ў зале прававой інфармацыі (пам. 207b) арганізавана тэматычная кніжная выстаўка “Ваша права на спрыяльнае навакольнае асяроддзе”.
Абарона і паляпшэнне навакольнага асяроддзя, а таксама ахова прыроды і рацыянальнае выкарыстанне яе рэсурсаў у інтарэсах цяперашняга і будучага пакаленняў – адна з задач, якія маюць вялікае значэнне для эканамічнага развіцця ўсіх без выключэння краін свету.
Сёння канцэпцыя ўстойлівага развіцця стала галоўным напрамкам у сацыяльна-эканамічнай палітыцы многіх краін свету. Усвядоміўшы характар супярэчнасцей паміж заканамернасцямі сацыяльна-эканамічнага развіцця і асноўнымі законамі біясферы, у першую чаргу развітыя краіны прыступілі да распрацоўкі новых безадходных тэхналогій, накіраваных на забеспячэнне экалагічнай бяспекі і ўстойлівага развіцця. Працэс гэты доўгі, асабліва для краін усходнеславянскага рэгіёну з састарэлай тэхналогіяй, слабай эканамічнай базай. Але, на жаль, забяспечыць устойлівае развіццё толькі сродкамі высокіх тэхналогій немагчыма.
Рашэнне дадзенай праблемы залежыць ад беражлівага стаўлення чалавека да прыроды, узроўню экалагічнай культуры, экалагічнай свядомасці і ведання прававых асноў, якія датычацца здаровага ладу жыцця. Без такога комплексу мер цяжка разлічваць на ўстойлівае развіццё і выжыванне грамадства ва ўмовах экалагічнага крызісу.
Экалагічная бяспека разглядаецца як стан абароненасці жыццёва важных інтарэсаў асобы, грамадства, навакольнага прыроднага асяроддзя ад пагроз, якія ўзнікаюць у выніку антрапагенных і прыродных уздзеянняў на яе. Аднак, на жаль, у адносінах да экалагічных праблем мы яшчэ мала інфармаваныя. Насельніцтва слаба ведае геаграфію актыўных крыніц распаўсюджвання і дапушчальных норм утрымання таксічных рэчываў у прадуктах харчавання і іншых таварах. Грамадзяне вельмі пасіўныя ў рашэнні экалагічных праблем і псіхалагічна не гатовыя да абароны сваіх праў, многія нават не ведаюць, што ў іх ёсць экалагічныя правы і магчымасць судовай абароны.
На выстаўцы прадстаўлена больш за 50 дакументаў.
Экспазіцыя складаецца з наступных раздзелаў:
- Міжнародныя прававыя дакументы па ахове навакольнага асяроддзя.
- Заканадаўства Рэспублікі Беларусь па ахове навакольнага асяроддзя.
- Абарона праў грамадзян на спрыяльнае навакольнае асяроддзе.
- Экалагічная бяспека – састаўная частка нацыянальнай бяспекі дзяржавы.
Выстаўка рэкамендуецца шырокаму кругу чытачоў, якія цікавяцца праблемамі экалагічнага права.
Кантактны тэлефон : 293-27-28.
 |
 |
