З 19 кастрычніка па 7 лістапада ў зале выяўленчых і відэадакументаў (пам. 307) ладзіцца выстаўка “Улюбёны ў класіку і Русь”, прысвечаная 170-годдзю з дня нараджэння В. В. Верашчагіна (1842–1904).
Васіль Васільевіч Верашчагін – рускі жывапісец, рысавальшчык, майстар батальнага жанру – пакінуў яркі след у гісторыі рускага мастацтва, азнаменаваў сваёй творчасцю новую старонку ў гісторыі сусветнага жывапісу.
Мастак прысвяціў сваю творчасць барацьбе супраць заваявальных войн. У яго карцінах з цвёрдым рэалізмам раскрываецца адваротны бок вайны, а салдат выступае галоўным героем і дзеючай асобай. Экспазіцыя знаёміць з рэпрадукцыямі цыкла работ В. Верашчагіна, прысвечаных Айчыннай вайне 1812 г. Гэта палотны “Апафеоз вайны”, “Пад Плеўнай”, “Начны прывал вялікай арміі” і інш.
Нягледзячы на тое, што Васіль Васільевіч быў гарачым патрыётам, ён шмат падарожнічаў. Уражанні ад паездак увасабляліся ў вялікіх цыклах эцюдаў і карцін. На выстаўцы прадстаўлены рэпрадукцыі карцін “Дзверы Тамерлана”, “Маўзалей Тадж Махал”, “Багаты кіргізскі паляўнічы з сокалам”, а таксама іншыя работы.
В. Верашчагін вядомы і ў якасці пісьменніка, публіцыста, які пакінуў пасля сябе вялікую літаратурную спадчыну – мемуары, перапіску і г. д.
Сярод экспанатаў – успаміны сына мастака, прысвечаныя яму творы.
Усяго ж на выстаўцы прадстаўлена звыш 80 дакументаў: кнігі, часопісы, паштоўкі і рэпрадукцыі карцін вядомага майстра жывапісу.
Экспазіцыя разлічана на ўсе катэгорыі чытачоў, якія цікавяцца творчасцю В. В. Верашчагіна, а таксама гісторыяй рускага мастацтва другой паловы XIX стагоддзя.
Кантактны тэлефон: (8 017) 293 27 58.