З 4 студзеня па 3 лютага ў зале беларускай літаратуры (пам. 205) праходзіць выстаўка “Святло чалавечай душы”, прысвечаная 80-годдзю з дня нараджэння беларускага пісьменніка Анатоля Паўлавіча Кудраўца.
“Чаму я пачаў пісаць? Відаць, таму, што не пісаць не мог”, – адзначаў у аўтабіяграфіі творца.
Анатоль Кудравец (1936–2014) – празаік, перакладчык, лаўрэат Дзяржаўнай прэміі Беларусі імя Я. Коласа, кавалер ордэна Дружбы народаў – пакінуў у прозе пасляваеннага пакалення глыбокі, своеасаблівы літаратурны след. Вострае адчуванне часу, узважанасць і вобразнасць слова, свежае бачанне красы роднай зямлі, дакладнасць псіхалагічнага малюнка чалавечай душы спалучаюцца ў пісьменніка з сыноўняй любоўю да Радзімы, клопатам пра перамогу праўды, пра шчасце для ўсіх, хто варты простага і гордага наймення Чалавек. Прызнанне да маладога літаратара прыйшло ўжо пасля выдання першага зборніка апавяданняў “На зялёнай дарозе”, які выйшаў у свет у 1968 годзе.
Юбілейную выстаўку адкрывае калекцыя ўласных выданняў аўтара. Сярод іх трэба асобна адзначыць раман “Сачыненне на вольную тэму” (1985), у якім створаны маштабны, каларытны вобраз селяніна, сумленнага шчырага працаўніка і абаронцы роднай зямлі. За гэты твор Анатоль Кудравец атрымаў Дзяржаўную прэмію Беларусі імя Я. Коласа (1986). У экспазіцыі таксама прадстаўлены збор твораў аўтара, кнігі прозы, часопісныя артыкулы за розныя гады.
Значную ролю ў дзейнасці пісьменніка займае літаратурны пераклад. Дзякуючы яго працы, на беларускай мове загучалі “Рабінзон Круза” Д. Дэфо, “Падарожжы Гулівера” Дж. Свіфта і інш. Разам з перакладамі твораў самога аўтара на розныя мовы (англійскую, нямецкую, эстонскую, рускую і інш.) яны склалі другі раздзел.
Біяграфічныя звесткі, а таксама шматлікія даследчыцкія матэрыялы па мастацкай спадчыне Анатоля Кудраўца, змешчаныя ў часопісных, энцыклапедычных артыкулах і асобных выданнях, склалі апошнюю частку экспазіцыі.
На выстаўцы сабрана звыш 90 дакументаў.
Кантактны тэлефон: (8 017) 293 27 16.
 |
 |
 |
 |
 |
 |
