З 19 лістапада па 7 снежня ў зале дакументаў міжнародных арганізацый (пам. 207g) арганізавана выстаўка “Спынім насілле!”, прысвечаная Міжнароднаму дню барацьбы за ліквідацыю насілля адносна жанчын.
Гэты Дзень быў абвешчаны Генеральнай Асамблеяй ААН 17 снежня 1999 года (рэзалюцыя 54/134) і штогод адзначаецца 25 лістапада.
Ва ўсім свеце жанчыны з’яўляюцца той сілай, якая змацоўвае сем’і, абшчыны і нацыі. Насілле ў дачыненні да жанчын – гэта абуральнае парушэнне праў чалавека, якое нясе велізарныя сацыяльныя і эканамічныя выдаткі. Яно ўяўляе сур’ёзную пагрозу для дасягнення міжнародна ўзгодненых мэт у сферы развіцця.
Насілле адносна жанчын і дзяўчынак з’яўляецца праблемай пандэмічных маштабаў. Яно не абмяжоўваецца якой-небудзь асобнай культурай, краінай або рэгіёнам, альбо пэўнай групай жанчын у рамках якога-небудзь супольніцтва. Жанчыны з’яўляюцца ахвярамі насілля незалежна ад узроўню дастатку, класавай, расавай або этнічнай прыналежнасці. Па меншай меры, кожная трэцяя жанчына ў свеце на працягу свайго жыцця пацярпела пабоі, прымушэнне да сексу або якія-небудзь іншыя формы жорсткага абыходжання з боку, як правіла, блізкага ёй чалавека. Штогод ад 500 тысяч да 3 мільёнаў чалавек, у асноўным жанчыны і дзеці, становяцца ахвярамі гандлю людзьмі,трапляючы ў рабства або прымусовае становішча.
Насілле ў дачыненні да жанчын – з’ява складаная і шматгранная. Яна праяўляецца і ў цалкам відавочных фактах, і завуаліравана пад з’явамі, якія сталі ўжо звыклымі для нашага жыцця. Але ніякае насілле не праходзіць бясследна. Каб выкараніць гэта канчаткова, патрэбны ўсёабдымныя меры, якія маюць грамадскі характар і замацаваны заканадаўча.
Усведамляючы ўсю важнасць і глабальнасць гэтай праблемы, 20 снежня 1993 года Генеральная Асамблея прыняла Дэкларацыю па выкараненні насілля адносна жанчын (A/RES/48/104), а ў лютым 2008 года Генеральны сакратар ААН Пан Гі Мун абвясціў аб пачатку правядзення кампаніі “Разам пакончыць з насіллем у дачыненні да жанчын”, накіраванай на распрацоўку і прыняцце пэўных мер па прадухіленні і выкараненні насілля адносна жанчын і дзяўчынак ва ўсім свеце.
У Рэспубліцы Беларусь надаецца вялікая ўвага рашэнню праблем насілля. Стратэгіі дзейнасці, якая накіравана на папярэджанне, спыненне і выкараненне гэтага зла, наша краіна прытрымліваецца як на айчыннай, так і на міжнароднай арэне. Беларусь выступіла арганізатарам шэрагу міжнародныхмерапрыемстваў, накіраваныхна фарміраванне эфектыўнага глабальнага партнёрства супраць рабства і гандлю людзьмі ў XXI стагоддзі і насілля ў дачыненні да жанчын.
Дакументы, прадстаўленыя на выстаўцы, раскрываюць шматгранную дзейнасць ААН, іншых міжнародных арганізацый, жаночых рухаў і аб’яднанняў,накіраваную на барацьбу з насіллем, знаёмяць з рознымі аспектамі вывучэння гендарных праблем, раскрываюць ролю жанчыны ў сучасным грамадстве.
У экспазіцыі прадстаўлена больш за 70 дакументаў на рускай, англійскай, французскай і нямецкай мовах: кнігі, перыядычныя выданні, мімеаграфаваныя матэрыялы ААН (мастхед), брашуры, буклеты.
Выстаўка складаецца з наступных раздзелаў:
- Міжнародныя і рэгіянальныя прававыя дакументы, накіраваныя на ліквідацыю насілля адносна жанчын.
- Праблема насілля ў дачыненні да жанчын у Рэспубліцы Беларусь.
- Дамашняе насілле. Меры па папярэджанні і спыненні насілля адносна жанчын у сям’і.
- Жанчына і ўзброеныя канфлікты.
- Жанчына як тавар – праблема гандлю людзьмі.
- Сацыяльная няроўнасць і гендарная дыскрымінацыя.
Выстаўка будзе цікавая студэнтам, выкладчыкам, сацыяльным педагогам, псіхолагам, юрыстам, спецыялістам у сферы супрацьдзеяння гандлю людзьмі, актывістам праваабарончых і няўрадавых арганізацый.
Карысныя спасылкі
- Міжнародны дзень барацьбы за ліквідацыю насілля ў дачыненні да жанчын
- Кампанія 2012 года “16 дзён барацьбы супраць насілля ў дачыненні да жанчын”
- Дзейнасць ААН па паляпшэнні становішча жанчын
- Глабальная стратэгія аховы здароўя жанчын і дзяцей
- Жанчыны і правы чалавека
- ААН працуе над паляпшэннем становішча жанчын
- Жанчыны, мір і бяспека
- Дапаможнік для парламентарыяў: Канвенцыя аб ліквідацыі ўсіх форм дыскрымінацыі жанчын і Факультатыўны пратакол да яе
- Сесія Камісіі па становішчы жанчын [Пекін+10] ( Нью-Ёрк, 28 лютага – 11 сакавіка 2005 г.)
- Спецыяльная сесія Генеральнай Асамблеі [Пекін+5] (Нью-Ёрк, 5–9 чэрвеня 2000 г.)
- Чацвёртая Сусветная канферэнцыя па становішчы жанчын (Пекін, 4–15 верасня 1995 г.)
- Міжнародны жаночы дзень (8 сакавіка)
- Міжнародны дзень сельскіх жанчын (15 кастрычніка)
Дэкларацыі, канвенцыі і дагаворы
- Тыпавыя стратэгіі і практычныя меры па выкараненні насілля адносна жанчын у сферы папярэджання злачыннасці і крымінальнага правасуддзя (1997)
- Дэкларацыя аб выкараненні насілля ў дачыненні да жанчын (1993)
- Канвенцыя аб ліквідацыі ўсіх форм дыскрымінацыі адносна жанчын (1979) (гл. таксама Факультатыўны пратакол)
- Дэкларацыі па правах жанчын
- Канвенцыі па правах жанчын
- Рамачная праграма дзеянняў Кампаніі Генеральнага сакратара ААН “Разам пакончым з насіллем адносна жанчын”
Кантактны тэлефон: (8 017) 293 27 34.