З 12 студзеня па 19 лютага ў зале нотных і аўдыядакументаў (пам. 305) арганізавана выстаўка “Пясняр, улюбёны ў Беларусь”, прысвечаная 70-годдзю з дня нараджэння музыканта, кампазітара Уладзіміра Георгіевіча Мулявіна (1941– 2003).
Народнаму артысту Беларусі і СССР, заснавальніку і мастацкаму кіраўніку беларускага вакальна-інструментальнага ансамбля “Песняры” У. Г. Мулявіну належыць асаблівае месца ў гісторыі айчыннай культуры ХХ стагоддзя. Выдатны музыкант, рускі па паходжанні, ён прысвяціў сябе беларускай песні і зрабіў яе папулярнай ва ўсім свеце. У сваіх творах Уладзімір Георгіевіч увасобіў вобраз гордай, мужнай і добрай Беларусі, перадаў непаўторную своеасаблівасць народных мелодый і высокую паэзію беларускай мовы.
Уладзімір Мулявін нарадзіўся 12 студзеня 1941 г. у г. Свярдлоўску. Пасля заканчэння музычнага вучылішча прыехаў у Беларусь, з якой назаўжды звязаў сваё асабістае жыццё і творчы лёс. З 1962 г. працаваў артыстам Беларускай дзяржаўнай філармоніі. А ў 1969 г. стаў мастацкім кіраўніком створанага ім ансамбля “Песняры”.
Самабытнасць і непаўторнасць – вось дзве галоўныя састаўныя поспеху калектыву. Шматгранны талент Уладзіміра Георгіевіча, увасоблены ў творчасці “Песняроў”, адкрыў новую эпоху ў беларускім эстрадным мастацтве. У яго выдатных песнях багатая музычная і паэтычная спадчына беларускага народа набыла сучаснае гучанне.
Уладзімір Мулявін быў таксама выдатным спеваком, уладальнікам прыгожага драматычнага тэнару, яго голас пазнавалі з першай ноты. Шматлікія прыхільнікі творчасці “Песняроў” з захапленнем слухаюць такія шэдэўры, як “Завушніцы”, “Александрына”, “Чырвоная ружа”, “Ой, калядачкі”, “Беловежская пуща”, “Белоруссия” і многія іншыя.
На выстаўцы прадстаўлена больш за 40 дакументаў, прысвечаных творчасці кампазітара і ансамбля: ноты, кампакт-дыскі, грамафонныя запісы, артыкулы і кнігі.
Кантактны тэлефон: 293-27-52.
 |
 |
|||||||
 |
 |
