З 11 студзеня па 14 лютага ў зале беларускай літаратуры (пам. 205) праходзіць юбілейная кніжная выстаўка “Прага шчасця”, прысвечаная 70-годдзю беларускай паэтэсы, перакладчыцы Веры Вярбы (Гертруды Пятроўны Сакаловай).
Тонкі лірык і сапраўдны майстар слова, В. Вярба прыйшла да свайго чытача з пяшчотаю, любоўю і цеплынёю. Яна аўтар шматлікіх кніг паэзіі. Вершы паэтэсы – лірычная споведзь пра час і сваё пакаленне.
Асноўныя матывы – услаўленне маладосці, кахання, мацярынства, роздум над гісторыяй роднага краю і праблемамі сучаснасці. Творы паэтэсы вызначаюцца летуценнасцю, рамантычнай прыўзнятасцю, і разам з тым у іх адчуваецца разгубленасць перад нялёгкімі жыццёвымі выпрабаваннямі, разуменне складанасці жаночага лёсу.
Усеагульную вядомасць і прызнанне В. Вярбе прынёс верш “Ручнікі”. Дзякуючы музыцы кампазітара М. Пятрэнкі і асабліваму майстэрскаму выкананню ансамблем “Песняры”, верш стаў сапраўды народнай песняй.
Экспазіцыя знаёміць наведвальнікаў з першымі вершамі паэтэсы, якія былі надрукаваны ў 1958 г. у рэспубліканскіх часопісах, паэтычнымі зборнікамі “Вочы вясны” (1962), “Белыя пісьмы” (1967), “Высакосны год” (1969), “Сіняя бухта” (1975), “Альфа” (1978), “Яраслаўна” (1986) і інш.
Раздзел выстаўкі “Шырэй глядзець на свет” прысвечаны перакладчыцкай дзейнасці В. Вярбы. Пісьменніца перакладала з украінскай, яўрэйскай, рускай, літоўскай і іншых моў. Самым адметным і плённым стаў яе пераклад на беларускую мову аповесці Р. Фраермана “Дзікі сабака Дзінга, або Аповесць пра першае каханне” (1975).
Асобна прадстаўлены на выстаўцы творы Веры Вярбы ў перакладах.
У раздзеле “Здзіўляцца, шукаць і гарэць“ прадстаўлены публікацыі пра жыццё і творчасць паэтэсы, якія змешчаны ў энцыклапедычных выданнях, кнігах і часопісах.
Экспазіцыя налічвае каля 100 дакументаў.
Кантакты тэлефон: 293-27-16.
 |
 |
 |
 |
 |
 |
