З 9 па 29 лютага ў зале беларускай літаратуры (пам. 205) праходзіць выстаўка “Пошукі слова”, прымеркаваная да 60-годдзя беларускага пісьменніка Уладзіміра Ягоўдзіка.
Імя празаіка і драматурга, лаўрэата прэміі Федэрацыі прафсаюзаў Беларусі (1993), Літаратурнай прэміі імя Янкі Маўра (1994) Уладзіміра Іванавіча Ягоўдзіка даўно вядома і прызнана сярод сучасных беларускіх чытачоў. Ён шмат піша для дзяцей, выступае як аўтар літаратурна-крытычных і мастацтвазнаўчых артыкулаў, перакладае з рускай і ўкраінскай моў. Творы пісьменніка разнастайныя па тэматыцы і жанры. Ім уласцівы сюжэтная стройнасць і стылёвая зладжанасць, актыўнасць аўтарскай пазіцыі, праўдзівасць і шчырасць.
Выстаўку адкрывае раздзел «Настроенасць на цуд», у якім шырока прадстаўлены творы пісьменніка як у асобных выданнях, так і ў зборніках. Сярод прац – першая кніга празаіка “Стронга” (1984), кніга пра пісьменнікаў і мастакоў “Белыя рысы на чорным полі” (1995), “Выбранае” ў 2-х кнігах (2005), серыя кніг аб роднай прыродзе “Скарбы Радзімы”, кніга п’ес-казак для дзяцей “Спеўны кірмаш” (2011), кніга апавяданняў і мініяцюр “Лясныя таямніцы” (2014) і інш.
Цікавымі для азнаямлення будуць і пераказы беларускіх народных легенд і паданняў “Вужовы кароль” (1996), беларускіх народных казак “Царэўна ў падземным царстве” (2000), помніка старажытнай славянскай літаратуры “Аповесць мінулых гадоў” (1999).
З перакладчыцкай дзейнасцю У. Ягоўдзіка пазнаёміць другі раздзел экспазіцыі “Прыручэнне слова”. На беларускую мову ім перакладзены раман В. Астаф’ева “Сумны дэтэктыў” (1992), апавяданне Д. Кешэля “Хай беражэ цябе мая любоў…” (1985). На экспазіцыйных паліцах наведвальнікі выстаўкі ўбачаць і пераклады твораў пісьменніка (“Горсть ягод” (2007), “В царстве Водяного” (1992) і інш.). Дапаўняюць раздзел кнігі, дзе У. Ягоўдзік выступае як укладальнік (А. Траяноўскі “Дні – як лукі” (2006), Алена Лось: жывапіс, графіка” (2009)).
У заключным раздзеле “Дарогі ў жыццё” прадстаўлены літаратурна-крытычныя публікацыі пра жыццё і творчасць пісьменніка. Сярод матэрыялаў – даведачна-энцыклапедычная літаратура і перыядычныя выданні – часопісы “Роднае слова”, “Маладосць”, “Полымя” і інш.
Усяго экспазіцыя налічвае каля 100 выданняў.
Кантактны тэлефон: (8 017) 293 27 16.