З 6 па 15 красавіка ў зале дакументаў міжнародных арганізацый (пам. 207g) адкрыта тэматычная выстаўка “Перамажыце дыябет!”, прысвечаная Сусветнаму дню здароўя.
Гэты Дзень быў заснаваны на першай сесіі Сусветнай асамблеі аховы здароўя ў 1948 годзе і штогод адзначаецца 7 красавіка, пачынаючы з 1950 года. Дата выбрана не выпадкова – 7 красавіка 1948 года ўступіў у сілу Статут Сусветнай арганізацыі аховы здароўя (СААЗ).
Сусветны дзень здароўя – гэта глабальная кампанія, накіраваная на прыцягненне ўвагі кожнага жыхара нашай планеты да праблем здароўя і аховы здароўя. Традыцыя яго правядзення дае ўнікальную магчымасць завастрыць увагу сусветнай супольнасці на праблемах грамадскай аховы здароўя і пытаннях здароўя людзей і заахвоціць урады, міжнародныя арганізацыі, дзелавыя кругі і грамадзянскае супольніцтва да сумесных намаганняў, накіраваных на рашэнне гэтых праблем.
Кожны год для Сусветнага дня здароўя выбіраецца тэма, якая адлюстроўвае якую-небудзь глабальную праблему, што стаіць перад аховай здароўя чалавецтва. Сёлета тэма Дня – “Перамажыце дыябет!”.
Дыябет – гэта хранічная хвароба, якая ўзнікае ў тых выпадках, калі падстраўнікавая залоза не выпрацоўвае досыць інсуліну або калі арганізм не можа эфектыўна выкарыстаць інсулін, які ім выпрацоўваецца. Гэта прыводзіць да павышанага ўзроўню глюкозы ў крыві – гіперглікеміі. Для дыябету першага тыпу, вядомага як інсуліназалежны, або дзіцячы дыябет, характэрна адсутнасць выпрацоўкі інсуліну. Дыябет другога тыпу, які мае назву інсуліннезалежны, або дарослы дыябет, развіваецца ў выніку неэфектыўнага выкарыстання арганізмам інсуліну. На другі тып дыябету пакутуюць 90 % людзей з агульнага ліку хворых дыябетам у свеце.
Гіперглікемія, або павышаны ўзровень утрымання цукру ў крыві, з часам прыводзіць да сур’ёзнага пашкоджання шматлікіх сістэм арганізма – дыябет можа паражаць сэрца, крывяносныя сасуды, вочы, ныркі і нервы. Дыябет павышае рызыку развіцця хвароб сэрца і інсульту, павышае верагоднасць з’яўлення на нагах язваў, інфіцыравання і, у выніку, неабходнасці ампутацыі канечнасцей. Дыябет уваходзіць у лік асноўных прычын нырачнай недастатковасці, агульная рызыка смяротнасці сярод людзей з дыябетам як мінімум у 2 разы перавышае рызыку смерці сярод людзей таго ж узросту, у якіх няма гэтай хваробы.
Эпідэмія дыябету імкліва нарастае. Ва ўсім свеце колькасць людзей, якія пакутуюць на дыябет, павялічылася ад 108 мільёнаў у 1980 годзе да 422 мільёнаў у 2014 годзе. У 2014 годзе ўзровень захворвання на дыябет склаў 9 % сярод дарослага насельніцтва 18 гадоў і старэй. Па ацэнках, у 2012 годзе 1,5 мільёна смяротных выпадкаў адбылося па прычыне дыябету. Больш за 80 % выпадкаў смерці ад дыябету здараецца ў краінах з нізкім і сярэднім узроўнем прыбытку. Па прагнозах САЗ, у 2030 годзе дыябет стане сёмым па значнасці прычын смяротнасці ў свеце.
Аднак значную частку выпадкаў захворвання на дыябет другога тыпу можна прадухіліць. Каб спрыяць папярэджанню хваробы і яе ўскладненняў, неабходна весці здаровы лад жыцця: падтрымліваць нармальную вагу цела, прытрымлівацца здаровага харчавання, спажываючы садавіну і гародніну і памяншаючы спажыванне цукру і насычаных тлушчаў, быць фізічна актыўным, пазбягаць ужыванне тытуню.
СААЗ імкнецца стымуляваць і падтрымліваць прыняцце эфектыўных мер па эпідэмнаглядзе, папярэджанні і барацьбе з дыябетам і яго ўскладненнямі, ажыццяўляючы каардынацыю міжнароднай і нацыянальнай палітыкі ў гэтай галіне і надаючы асноўную ўвагу падыходам, што ахопліваюць усё насельніцтва і накіраваны на заахвочванне здаровага харчавання і рэгулярнай фізічнай актыўнасці.
На выстаўцы прадстаўлена звыш 30 дакументаў: кнігі, брашуры і перыядычныя выданні на рускай і англійскай мовах.
Экспазіцыя змяшчае наступныя тэматычныя раздзелы:
- Міжнародныя рэкамендацыі і стандарты ў галіне аховы здароўя, дзейнасць СААЗ.
- Дыябет: дыягностыка, лячэнне прафілактыка.
- Ахова здароўя і меры, накіраваныя на барацьбу з дыябетам у Рэспубліцы Беларусь.
Выстаўка будзе карысная спецыялістам у галіне аховы здароўя, медыцынскім работнікам, навуковым супрацоўнікам, выкладчыкам, студэнтам вышэйшых навучальных устаноў, а таксама ўсім, хто цікавіцца пытаннямі здаровага ладу жыцця і мерамі, накіраванымі на папярэджанне дыябету другога тыпу і яго ўскладненняў.
Карысныя спасылкі
- Інфармацыйны бюлетэнь аб дыябеце
- Якія рызыкі развіцця дыябету ў дзяцей?
- 10 фактаў аб дыябеце
- Сусветны дзень барацьбы супраць дыябету
- Асноўныя звесткі пра дыябет
- Тэматычны агляд пра дыябет
- Інфармацыйны сайт па дыябеце
Дзейнасць СААЗ
Праграма СААЗ па дыябеце
Публікацыі
- Даклад аб хранічных хваробах (2011)
- Дыябет: салодкая іронія сучаснай тэхналогіі (Бюлетэнь СААЗ, люты 2011)
- Цяжар дастатку (Бюлетэнь СААЗ, люты 2010)
- Вызначэнне і дыягностыка цукровага дыябету і прамежкавых гіперглікемій
- Глабальная стратэгія па харчаванні, фізічнай актыўнасці і здароўі