З 7 мая па 8 ліпеня ў зале нотных і аўдыявізуальных дакументаў (пам. 305) праходзіць выстаўка “Музыкант элегій, ціхай споведзі і мар”, прысвечаная 170-годдзю з дня нараджэння французскага кампазітара Г. Фарэ.
Творчасць кампазітара, арганіста, дырыжора і педагога Габрыэля Фарэ (1845–1924) заснавана на класічных і рамантычных традыцыях, і ў той жа час яго стылю ўласцівыя рысы, якія прадвызначылі музычны імпрэсіянізм. Ён аўтар вялікай колькасці сачыненняў. Пісаў оперы, сімфанічную і харавую музыку. Улюбёным жанрам кампазітара стала лірычная мініяцюра – інструментальная і вакальная. Яго фартэпіянныя мініяцюры вылучаюцца класічнай завершанасцю і элегантнасцю формы, тонкасцю гарманічных фарбаў, далікатнасцю фактуры. За прыхільнасць да гэтага жанру яго часта звалі “французскім Шуманам”.
Характарызуючы творчасць Г. Фарэ, французскі кампазітар Д. Мійё пісаў: “Сціпласць ужытых сродкаў і пачуццё меры ў лірызме не даюць яго голасу састарэць. Свежасць тэм, вынаходлівасць гармоній, неверагодная разнастайнасць мадуляцый заўсёды захоўваюць за яго музыкай тую навізну, якая перш за ўсё звяртае на сябе ўвагу, калі слухаеш яго творы”.
На выстаўцы шырока прадстаўлена вакальная і камерна-інструментальная музыка Г. Фарэ: рамансы “Абуджэнне”, “Матылёк і фіялка”, “Сільвія”, “Тасканская серэнада”, песні, хоры, п’еса “Сіцыліяна” (1893), “Долі” (6 п’ес для фартэпіяна ў 4 рукі, 1893–1896), санаты, прэлюдыі і інш. Сярод экспанатаў таксама сюіта для аркестра “Пелеас і Мелізанда” (1898) і Рэквіем (1888).
Дапаўняюць экспазіцыю артыкулы і кнігі пра творчасць кампазітара.
Кантактны тэлефон: (8 017) 293 27 52.
 |
 |
 |
 |
 |
 |
 |
 |
 |
 |
 |
 |
