З 8 студзеня па 7 лютага ў зале беларускай літаратуры (пам. 205) праходзіць выстаўка “Майстар сваёй справы”, прысвечаная 80-годдзю беларускага перакладчыка Васіля Сяргеевіча Сёмухі.
Нарадзіўся будучы перакладчык 18 студзеня 1936 г. на хутары Ясенец Пружанскага раёна Брэсцкай вобласці ў сям’і лесніка. У 1959 г. скончыў рамана-германскае аддзяленне філалагічнага факультэта Маскоўскага дзяржаўнага ўніверсітэта імя М. Ламаносава. Працаваў рэдактарам, інжынерам, выкладчыкам нямецкай мовы ў школе, літсупрацоўнікам газеты “Літаратура і мастацтва”, выкладаў нямецкую мову ў БДУ. З 1972 па 1994 г. быў рэдактарам выдавецтва “Мастацкая літаратура”.
Васіль Сёмуха на беларускую мову пераклаў Біблію, Стары і Новы Запаветы. З нямецкай мовы – творы І.В. Гётэ, Ф. Шылера, Г. Гейнэ, Г.Я.К. фон Грымэльсгаўзэна, Ф. Ніцшэ, Б. Брэхта, Т. Мана, М. Рыльке і інш.; з польскай – А. Міцкевіча, Ю. Тувіма, У. Сыракомлі і інш.; з латышскай мовы – Я. Райніса, В. Бэлшавіцу і інш.
За плённую перакладчыцкую дзейнасць Васіль Сёмуха быў узнагароджаны ордэнам “За заслугі перад Федэратыўнай Рэспублікай Германіяй”; ён з’яўляецца лаўрэатам Дзяржаўнай прэміі Беларусі імя Якуба Коласа, мае вышэйшую ўзнагароду Латвіі – “Ордэн трох зорак”.
Галоўнымі кнігамі перакладчыка з’яўляюцца: “Новы Запавет” (1995), “Біблія” (2002), “Найвышэйшая песня Саламонава” (1994). Васіль Сёмуха ўпершыню ў Беларусі пераклаў гэтыя кнігі на беларускую мову, што з’яўляецца вялікім дасягненнем аўтара.
Па выніках XLIX Нацыянальнага конкурсу “Мастацтва кнігі” выданне аўтара “Найвышэйшая песня Саламонава” (2008) у намінацыі “Лепшае літаратурна-мастацкае выданне” атрымала Дыплом 1-й ступені.
Адметнае месца сярод кніг, перакладзеных Васілём Сяргеевічам, займаюць наступныя выданні: І.В. Гётэ “Фаўст” (1976), Г. Грымэльсгаўзэн “Авантурнік Сімпліцысімус” (1997), К. Ман “Мэфіста” (2006), Г. Майрынк “Голэм” (2006), Ф. Шылер “Вершы і балады, драмы” (1993), Ф. Ніцшэ “Так сказаў Заратустра. Кніга ўсім і нікому” (1994).
Завяршае выстаўку падборка матэрыялаў пра жыццё і творчасць перакладчыка, прадстаўленая кнігамі, перыёдыкай і энцыклапедычнымі выданнямі. Сярод аўтараў – Л. Баршчэўскі, С. Шапран, А. Зарыцкі, А. Сямёнава і інш.
Усяго на выстаўцы каля 70 выданняў.
Кантактны тэлефон: (8 017) 293 27 16.