З 14 студзеня па 16 лютага ў бібліятэцы (2-гі паверх, кальцавы калідор) праходзіць выстаўка “Летапісец эпохі”, прысвечаная 95-годдзю з дня нараджэння выдатнага беларускага пісьменніка І.П. Шамякіна (1921–2004).
Іван Пятровіч Шамякін – пісьменнік сучаснасці і адначасова класік нацыянальнай літаратуры, чыё імя шырока вядома за межамі Беларусі. Яго творы перакладзены больш чым на 30 моў свету. Амаль паўстагоддзя пісьменнік працаваў у нацыянальнай літаратуры. Ён лаўрэат Дзяржаўнай прэміі СССР (1951), Літаратурнай прэміі імя Я. Коласа (1959), Дзяржаўнай прэміі Беларусі імя Я. Коласа (1968), Літаратурнай прэміі Міністэрства абароны СССР (1978), Прэміі Саюзнай дзяржавы Беларусі і Расіі (2002). Імем І. Шамякіна названа вуліца ў Мінску, Мазырскі дзяржаўны педагагічны ўніверсітэт.
У юбілейнай кніжнай экспазіцыі прадстаўлена каля 200 выданняў твораў пісьменніка і кнігі, прысвечаныя яго жыццю і творчасці.
У першым раздзеле выстаўкі “Творчая спадчына” прадстаўлены зборнікі і асобныя творы І. Шамякіна, якія былі выдадзены ў розныя гады і перакладзены на ўкраінскую, рускую, польскую, казахскую, малдаўскую, чэшскую, балгарскую, кітайскую, французскую, нямецкую і іншыя мовы. Сярод іх – зборы твораў; некалькі выданняў першага рамана пісьменніка “Глыбокая плынь” (1949), які зрабіў імя Шамякіна надзвычай вядомым; пенталогія “Трывожнае шчасце” (1957–1965), якая створана на аснове ўласнай біяграфіі Івана Пятровіча і жыцця яго блізкіх людзей; розныя выданні самага яго знакамітага рамана “Сэрца на далоні” (1964), што прынёс пісьменніку шырокую папулярнасць і заслужаную славу. Экспануюцца такія адметныя творы, як раманы “У добры час” (1953), “Крыніцы” (1957), “Снежныя зімы” (1970), “Атланты і карыятыды” (1974), “Вазьму твой боль” (1979), “Злая зорка” (1993).
У раздзеле змешчаны таксама кнігі пра творчасць юбіляра – “Творчае крэда” (1970), “Стыль пісьменніка” (1974), “Творчасць Івана Шамякіна ў кантэксце сучаснасці” (2001), В. Локун “Кругі жыцця – кругі літаратуры” (2002) і інш.
Другі раздзел “Жыццёвы шлях” прысвечаны старонкам біяграфіі І.П. Шамякіна, яго сябрам і аднадумцам, асяроддзю пісьменніка. Экспануецца шэраг кніг В. Каваленкі, альбом “Іван Шамякін: жыццё і творчасць” (1982), аўтабіяграфічныя творы пісьменніка “Карэнні і галіны” (1986), “Своя нелегкая дорога” (1990), “Роздум на апошнім перагоне: Дзённік 1980–1995 гадоў” (1998).
Кантактны тэлефон: (8 017) 293 28 86.