1 лістапада ў бібліятэцы ў рамках міжнароднага праекта “Францыск Скарына і яго эпоха” адбылося адкрыццё выстаўкі “Натхнёныя словам Купалы”.
Выстаўка прымеркана да 135-годдзя з дня нараджэння класіка беларускай літаратуры і 500-годдзя беларускага кнігадрукавання.
Духоўны свет паэзіі першага народнага паэта Беларусі і асноўныя тэмы яго творчасці – Радзіма, паэт і народ, прыгажосць роднага краю – натхнілі не адно пакаленне знакамітых беларускіх мастакоў. На выстаўцы прадстаўлены ілюстрацыі да твораў Янкі Купалы, якія ўвайшлі ў залаты фонд беларускай кніжнай графікі ХХ ст. Кнігі заснавальніка айчыннай літаратуры аформлены такімі творцамі, як А. Кашкурэвіч, В. Шаранговіч, Г. Паплаўскі, М. Басалыга, Б. Забораў, выданні з уладальніцкімі запісамі аўтара.
Арганізатары выстаўкі – Нацыянальная бібліятэка Беларусі і Дзяржаўны літаратурны музей Янкі Купалы – прадставілі каля 60 экспанатаў са сваіх збораў.
З прывітальнымі словамі выступілі намеснік дырэктара Нацыянальнай бібліятэкі Беларусі Аляксандр Суша і вядучы навуковы супрацоўнік Дзяржаўнага літаратурнага музея Янкі Купалы Галіна Варонава. Удзел у адкрыцці прыняў загадчык кафедры Беларускай дзяржаўнай акадэміі мастацтваў Юры Хілько.
Выстаўка працуе ў выставачнай зале (пам. 104) да 15 лістапада 2017 г. у адпаведнасці з умовамі наведвання міжнароднага выставачнага праекта “Францыск Скарына і яго эпоха”.
Тэлефон для даведак: (8 017) 293 27 22.
Да 130-годдзя з дня нараджэння народных паэтаў Беларусі Нацыянальнай бібліятэкай створаны віртуальны праект “Класікі сусветнай літаратуры Янка Купала і Якуб Колас”.
 |
 |
 |
 |
 |
 |
