Да свайго прафесійнага свята Нацыянальная бібліятэка Беларусі падрыхтавала тэматычную кніжную выстаўку «Храмы часу, памяці, думкі», якая будзе размешчана з 10 верасня па 31 кастрычніка на 2-м паверсе кальцавога калідора.
З 2001 года грамадскасць рэспублікі адзначае 15 верасня Дзень бібліятэк. Гэта дата прымеркавана да дня заснавання галоўнага кнігасховішча краіны – Нацыянальнай бібліятэкі Беларусі. Афіцыйнае святкаванне Дня бібліятэк сведчыць аб дзяржаўным прызнанні бібліятэкі важным сацыяльным інстытутам, дзейнасць якога дабратворна ўплывае на духоўны, культурны, адукацыйны і інтэлектуальны ўзровень нацыі.
Дзейнасць беларускіх бібліятэк ажыццяўляецца ва ўмовах дзяржаўнай падтрымкі вызначаных прыярытэтных напрамкаў – аўтаматызацыі, каардынацыі ў фарміраванні інфармацыйных рэсурсаў, інтэграцыі інфраструктуры бібліятэк усіх узроўняў у адзіную бібліятэчную сетку і інфармацыйнае ўзаемадзеянне.
Выстаўка «Храмы часу, памяці, думкі» паказвае бібліятэку як грамадскі інстытут, рысы якога, змест работы і яго маштабы не статычныя, а, насупраць, увесь час мяняюцца і трансфармуюцца, аднак сутнасць бібліятэкі застаецца нязменнай: яна па-ранейшаму – прытулак сусветнай мудрасці, захавальніца рукапісных і кніжных помнікаў пісьменства, аснова навуковай дзейнасці і гарант адукаванасці і культуры грамадства.
Экспазіцыя ўключае каля 200 выданняў па гісторыі бібліятэк і міжбібліятэчным узаемадзеянні, бібліятэчным заканадаўстве і кіраванні, сацыялагічных і навуковых даследаваннях, інавацыях у бібліятэчна-бібліяграфічным абслугоўванні чытачоў, а таксама пра вядомых людзей у галіне бібліятэчнай справы. Асобны раздзел прысвечаны Нацыянальнай бібліятэцы Беларусі.
Кантактны тэлефон: 293-28-86.