З 26 красавіка па 20 мая ў зале беларускай літаратуры (пам. 205) праводзіцца выстаўка “Каб жыла культура продкаў: беларускія народныя святы, абрады, традыцыі”.
Духоўным багаццем, якое мы атрымалі ў спадчыну ад продкаў, можна ганарыцца перад усім светам і, каб захаваць сваю самабытнасць у культурным асяроддзі, неабходна яго зберагчы і перадаць будучым пакаленням. Багацце гэта – народныя святы, абрады, звычаі. Да сённяшніх дзён яны не страцілі сваёй мэтавай накіраванасці і прызначэння ў народным жыцці, здолелі захаваць у сабе адну з найцікавейшых старонак народнага побыту, нашай нацыянальнай культурнай спадчыны.
Матэрыялы, прадстаўленыя ў экспазіцыі, дазволяць наведвальнікам падрабязней пазнаёміцца з тым, як святкавалі нашы продкі найбольш значныя ў іх жыцці каляндарныя і сямейна-бытавыя святы, дапамогуць выкарыстаць элементы традыцыйнай абраднасці пры правядзенні сучасных свят грамадскага гучання і сямейных урачыстасцей.
Увесь год нашы продкі жылі клопатамі аб зямлі і ўраджаі. Склалася цэлая сістэма свят, абрадаў, гульняў, ігрышчаў, што замацаваліся ў быце і зрабіліся пэўнымі арыенцірамі пры выкананні сельскагаспадарчых работ і пад час адпачынку ў гадавым коле. Пра зімовыя (Каляды, Масленіца, Грамніцы), веснавыя (Вялікдзень, Юр’я, Сёмуха), летнія (Купалле, Дажынкі), восеньскія (Багач, Дзяды), іншыя каляндарныя святы і абрады раскажуць выданні і публікацыі, змешчаныя ў раздзеле “Вясёлка часу”.
У раздзеле “Адвечны лад жыцця” сабрана літаратура, прысвечаная сямейна-абрадавым святам, а таксама забаронам, прадпісанням і правілам паводзін чалавека ў сям’і, якія звязаны з падрыхтоўкай і правядзеннем абрадаў сямейна-родавай накіраванасці – нараджэння, хрэсьбін, вяселля, пахавання.
Цікавым для настаўнікаў, класных кіраўнікоў, выхавальнікаў, кіраўнікоў фальклорных і тэатральных гурткоў будзе раздзел “Хутка ў нашай хаце свята”, які змяшчае метадычныя парады, рэкамендацыі па арганізацыі і правядзенні ранішнікаў, прысвечаных народным святам і абрадам, а таксама сцэнарыі правядзення Масленіцы, Вялікадня, вяселля, вячорак і іншых каляндарна-абрадавых і сямейна-бытавых свят.
Усяго экспазіцыя налічвае каля 300 кніг і часопісаў.
Кантактны тэлефон: (8 017) 293 27 16.
 |
 |
 |
 |
 |
 |
 |
 |
 |
 |
 |
 |
