З 10 па 30 лістапада 2008 ў зале дакументаў міжнародных арганізацый Нацыянальнай бібліятэкі Беларусі ( 2 паверх, пакой 207g) адкрыта тэматычная кніжная выстава “Інфармацыя для ўсіх: на шляху будаўніцтва грамадства ведаў”, прысвечаная Сусветнаму дню інфармацыі.
Гэты дзень адзначаецца штогод 26 лістапада па ініцыятыве Міжнароднай акадэміі інфарматызацыі (МАІ), якая мае генеральны кансультатыўны статус у эканамічным і Сацыяльным Савеце ААН.
Інфармацыя заўсёды адыгрывала ў жыцці чалавецтва вельмі важную ролю. “Хто валодае інфармацыяй, той валодае светам” – гэтыя словы, што сказаў Уінстан Чэрчыль ў снежні 1943 года, у наш час набываюць яшчэ большую значнасць і актуальнасць.
З сярэдзіны ХХ стагоддзя у выніку сацыяльнага прагрэсу і бурлівага развіцця навукі і тэхнікі роля інфармацыі невымерна ўзрасла. Са з’яўленнем камп’ютэрных камунікацыйных сістэм адбыўся якасны скачок ў развіцці інфармацыйнага асяроддзя. Адкрыліся новыя магчымасці доступу да рэгіянальнага, дзяржаўнага і сусветнага інфармацыйнага фонду, інфарматызацыя закранула ўсе віды і галіны чалавечай дзейнасці. З’явілася і стала развівацца сусветная сетка інтэрнет, якую па значнасці ўплыву на наша жыццё можна смела аднесці да найбольш значных адкрыццяў чалавецтва.
Выстава, якая прапануецца чытачам, налічвае каля 60 дакументаў, якія раскрываюць праблемы станаўлення сусветнага інфармацыйнага грамадства як чарговай прыступкі грамадскага і навукова-тэхналагічнага развіцця.
Вялікую частку экспазіцыі складаюць дакументы міжнародных арганізацый (ААН, ЮНЕСКА, Еўрапейскага Саюзу, Савету Еўропы і г.д.) на рускай і англійскай мовах: кнігі, перыядычныя выданні, мімеаграфаваныя матэрыялы ААН.
Экспазіцыя ўключае наступныя тэматычныя раздзелы:
- інфармацыя і фарміраванне інфармацыйнага грамадства;
- праграма ЮНЕСКА “Інфармацыя для ўсіх”. Сусветны саміт па інфармацыйным грамадстве; свабода інфармацыі і забеспячэнне доступу да інфармацыі;
- інфармацыйная глабалізацыя і міжнароднае супрацоўніцтва;
- развіццё інфармацыйных тэхналогій;
- інфармацыйная культура асобы.
Выстава будзе цікавая для спецыялістаў у галіне эканамічнай і сацыяльнай інфарматыкі, палітолагаў, сацыёлагаў, работнікаў інфармацыйнай і бібліятэчнай сферы, даследчыкаў СМІ, а таксама ўсіх, хто цікавіцца праблемамі інфармацыйнага грамадства.
Спасылкі на інтэрнет-рэсурсы
- Мэтавая група па ІКТ
- Інфармацыйна-камунікацыйныя тэхналогіі
- Камітэт па інфармацыі
- Акінаўская Хартыя глабальнага інфармацыйнага грамадства
- Праграма ЮНЕСКА “Інфармацыя для ўсіх”
- World Summit on the Information Society (Сусветны Саміт па Інфармацыйным Грамадстве)
- Стратэгічны план Праграмы ЮНЕСКА “Інфармацыя для ўсіх” на 2008 – 2013 гг..
- Спараваздача Праграмы ЮНЕСКА “Інфармацыя для ўсіх” за 2006 – 2007 гг.
 |
 |
 |
