З 5 сакавіка па 21 красавіка ў зале выяўленчых і відэадакументаў (пам. 307) ладзіцца выстаўка “Гімн прыгажосці чалавека”, прысвечаная 535-годдзю з дня нараджэння Мікеланджэла Буанароці (1475–1564).
Італьянскі скульптар, мастак, архітэктар, паэт Мікеланджэла Буанароці – адзін з самых дзіўных майстроў Высокага і Позняга Адраджэння ў Італіі і ў свеце. Па маштабе сваёй дзейнасці ён быў сапраўдным універсалам – геніяльным скульптарам, вялікім жывапісцам, архітэктарам, паэтам, мысліцелем. Манументальнасць, пластычнасць і драматызм вобразаў праявіліся ўжо ў ранніх работах майстра. Яго творы сцвярджаюць фізічную і духоўную прыгажосць чалавека, бязмежныя творчыя магчымасці.
Творы Мікеланджэла – фрэскавыя размалёўкі Сікстынскай капэлы ў Ватыкане, статуі Давіда і Майсея, сабор Св. Пятра ў Рыме – з’яўляюцца велізарным здабыткам усяго чалавецтва.
Творчасць мастака, якая стала бліскучым заключным этапам італьянскага Адраджэння, адыграла значную ролю ў развіцці еўрапейскага мастацтва, у многім падрыхтавала станаўленне маньерызму, аказала вялікі ўплыў на фарміраванне прынцыпаў барока.
У экспазіцыі прадстаўлена звыш 160 дакументаў – альбомаў, кніг, артыкулаў, паштовак і рэпрадукцый работ вялікага майстра.
Выстаўка разлічана на ўсе катэгорыі чытачоў, якія цікавяцца мастацтвам італьянскага Адраджэння і творчасцю Мікеланджэла Буанароці.
Кантактны тэлефон: 293-27-58.
 |
 |
 |
 |
 |
 |
 |
 |
 |
